«Веру, што арляня — не спыніць!». Палітвязень Максім Знак даслаў верш з Валадаркі

Аўтар «Новага Часу» Марыя Мартысевіч атрымала ліст ад адваката Максіма Знака, які ўжо сем месяцаў знаходзіцца пад вартай. І знайшла там верш.

ВЯЛІКАЕ АРЛЯНЯ

Я чакаю яго і чакаю,

Ужо месяц чакаю штодня!

Прылятае да нас, прылятае...

Ўсё ляціць і ляціць арляня.

Сведкі кажуць: з далёкага Поўдня

Арляня паляцела да нас...

Мо яно прыляціць нават сёння!

Так чакаем вясны ў першы раз.

Ты ляці, арляня, па-над пляжам,

На гарачы пясок не сядай!

Прылятай жа хутчэй, прылятай жа,

Прылятай, арляня, ў родны край!

Тут у дворыках лёд на падлозе

І ваконца для сонца няма...

Добры жарт, арляня, але годзе -

Прылятай, не катуй нас дарма.

Кажуць людзі: не будзе вар'яцтва -

Там цяплынь, там уключана ўсё.

Арляня не захоча вяртацца -

Можна ў выраі бавіць жыццё!

Бы ў дзяцінстве, наіўна і шчыра,

Веру, што арляня - не спыніць!

Прыляціць арляня ў родны вырай.

Белы бусел таксама ляціць.

Максім Знак напісаў пра свой верш так: «Я не ведаю дакладна, як гэта птушка выглядае і чаму яна завецца вялікай, калі яна яшчэ арляня, аднак я ведаю, што яны разам з белым буслом ужо ляцяць (а мяркуючы па сённяшнім надвор'і, ужо даляцелі) у Беларусь, таму з іх прылётам вясна стане вясновай і вельмі цёплай... Дарэчы, верш спрацаваў і літаральна на наступны дзень заззяла сонейка і лёду больш няма. Прынамсі ў тых дворыках, якія мы бачылі ўчора і сёння. Ура!»

Адваката і члена Прэзідыума Каардынацыйнай рады Максіма Знака затрымалі 9 верасня. Яго абвінавацілі ў закліках да дзеянняў супраць нацбяспекі (ч.3 арт. 361 КК). Яму некалькі разоў працягвалі тэрмін утрымання пад вартай, апошніраўз — да 9 мая.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: