Вольга Івашына: Дзяніс чакае падтрымкі

Дзяніса Івашына трымаюць за кратамі ў турме з 12 сакавіка 2021 года, калі журналіста схапілі па дарозе каля дому,  калі ён ішоў у аптэку па лекі.

За гэты час яго жонка Вольга атрымала ад мужа толькі адзін ліст — 7 красавіка. Ліст датаваны 17 сакавіка, і ў ім Дзяніс апроч прыватных рэчаў да жонкі, перадае прывітанні ўсім сваім сябрам і знаёмым.

Пра ліст ад мужа распавядае Вольга Івашына:

— Гэта першы ліст за месяц, і можна ўявіць сабе, што за гэты час былі яшчэ нейкія лісты, і іх мы можам чакаць яшчэ даўжэй.

Вольга Івашына кажа, што кантакты з мужам толькі праз адваката.

«Адвакат кажа толькі агульныя рэчы: як сябе адчувае Дзяніс, што яму перадаць. Кажа, што Дзяніс сумуе па ўсіх нас».

Вольга кажа, што адвакат таксама перадаваў, што да Дзяніса дайшлі некалькі лістоў, якія пісала яму сям’я: жонка і маці.

Таксама Вольга Івашына напісала заказны ліст следчаму, што вядзе справу Івашына з просьбаю аб сустрэчы з мужам.

Вольга Івашына таксама паведаміла пра тое, што да яе дайшлі звесткі пра тое, што Дзяніс за кратамі пабачыўся з іншым палітзняволеным — вядомым беларускім мастаком Алесем Пушкіным, і яны нават перамовіліся некалькімі словамі.

Дзяніса Івашына затрымалі 12 сакавіка. Да позняй ночы ў кватэры журналіста сілавікі праводзілі ператрус. Таксама ў той вечар вобшук зрабілі дома ў маці Дзяніса, а 15 сакавіка прыйшлі з вобшукам да яго 95-гадовай бабулі.

Дзяніс Івашын займаецца расследаваннямі. У Беларусі супрацоўнічае з рэдакцыяй газеты «Новы Час». Апошні яго матэрыял для «Новага Часу» быў пра тое, як былыя ўкраінскія «беркутаўцы» паспяхова ўладкаваліся на службу ў беларускую міліцыю.

Таксама ён з'яўляецца журналістам і рэдактарам беларускай службы сайта «ІнформНапалм».

Напісаць ліст Дзянісу можа кожны на адрас:

Івашыну Дзянісу Яўгенавічу, турма №1, вул. Кірава 1, Гродна, 230023

baj.by

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: