Вольга Севярынец звярнулася да сілавікоў: «Вы — частка страшнай сістэмы»

Апошнія 18 сутак сустаршыню БХД і аднаго з актыўных арганізатараў «антыінтэграцыйных пратэстаў» Паўла Севярынца трымаюць у карцары ў страшных умовах. Яшчэ на мінулым тыдні Павел атрымаў чарговыя 15 сутак адміністрацыйнага арышту і вымушаны быў ускрыць сабе вены на знак пратэсту супраць невыносных умоваў утрымання.


Жонка палітыка Вольга Севярынец распавядала на мінулым тыдні, што перадачы немагчыма перадаць, бо іх на Акрэсціна перасталі прымаць. Пры гэтым актывісты, якія выйшлі з ізалятара, скардзяцца на невыносныя ўмовы зняволення, здзекі і шантаж. 18 чэрвеня на чарговым судзе над Севярынцам, які праходзіў праз Skype, высветлілася, што на знак пратэсту супраць невыносных умоваў утрымання палітык быў вымушаны ўскрыць сабе вены.

Зварот да сілавікоў, суддзяў і міністэрстваў жонка Паўла — Вольга Севярынец апублікавала ў сваім фэйсбуку:

Я, жонка Паўла Севярынца, якога ўжо 18 сутак ні за што трымаюць у нечалавечых умовах у карцары на Акрэсціна, звяртаюся да супрацоўнікаў міліцыі, судоў, ізалятараў і міністэрстваў.

Я ўсё яшчэ веру, што сярод вас таксама ёсць сумленныя людзі.

Я бачу, як вы апускаеце вочы на незаконных судах, як у вас дрыжаць рукі, калі прыходзіш да вас са скаргай, я бачу на вашых руках заручальныя пярсцёнкі, значыць дома вас таксама чакае сям’я, і я ўпэўнена, што для сваіх жонак і дзяцей вы б хацелі быць прыкладам.

Я хачу сказаць: дзе б вы ні працавалі, спосаб застацца чалавекам ёсць заўсёды. Можна занесці асуджанаму ў карцар бутэльку вады, не выганяць родных з залі суда, не адпраўляць сфабрыкаваную справу на дапрацоўку, адвярнуцца, прамаўчаць, захварэць, звольніцца.

Вы — частка страшнай сістэмы, і ў тым ліку дзякуючы вам, яна спраўна працуе.

Улада робіць беззаконне: саджае невінаватых на суткі, катуе іх па карцарах, раздае несправядлівыя прысуды, хапае людзей на вуліцы, ні за што выпісвае штрафы. І гэтае беззаконне робіцца вашымі рукамі. Скажыце, вам гэта трэба?

Гэта трэба вашым сем’ям? Гэта трэба вашым дзецям?

Нягодны ўчынак нельга апраўдаць загадам.

Ілжэсведчанне, хлусня, збіццё і катаванне беззабаронных – учынкі, нявартыя ні сапраўдных мужчын, ні жанчын.

Вы цудоўна ведаеце, што людзі, якія зараз выходзяць на вуліцы, ні жулікі і ні бандыты, мы адукаваныя сумленныя людзі, у якіх забралі права выбіраць.

І мы не хочам больш баяцца, што за наша меркаванне ў нас забяруць дзяцей, мы не хочам чакаць месяцамі сваіх мужоў з сутак, мы не хочам адусюль цярпець недагаворкі і здзекі. Мы хочам траціць свае сілы на іншае.

Не бойцеся! У вас яшчэ ёсць шанец застацца людзьмі. Проста станьце з намі ў адзін шэраг, будзьце ўпэўненыя — людзі вас не пакінуць.

І не думайце, што ад вас нічога не залежыць, зараз час, калі ад кожнага беларуса залежыць усё”.  

Праваабаронцы ўжо звярнуліся да начальніка ГУУС Мінгарвыканкама па факце жорсткага, бесчалавечнага, прыніжаючага годнасць абыходжання.




Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: