За крытыку ўлады — лячыць ад трызнення

80-гадоваму Аляксандру Лапіцкаму паставілі дыягназ «трызненне».


Мінчука прызналі вінаватым у публічнай абразе кіраўніка Беларусі, генеральнага пракурора Аляксандра Канюка, а таксама шэрагу беларускіх суддзяў ды пракурораў. Такое рашэнне прыняў 12 ліпеня сталічны суд Фрунзенскага раёну.

Першы раз справа разглядалася ў красавіку. Падставай для прыцягнення пенсіянера да крымінальнай адказнасці сталі яго звароты да чыноўнікаў, у якіх ён выкарыстаў непрыстойныя выразы.

Праваабаронцы звяртаюць увагу на тое, што Лапіцкі сапраўды выкарыстоўваў такія выразы, але ён не канкрэтызаваў, у адрас каго канкрэтна яны накіраваныя. Такім чынам, лічаць праваабаронцы, у дачыненні да пенсіянера можна было пачаць адміністрацыйны працэс, але не крымінальны пераслед.

У сваіх зваротах Лапіцкі скардзіўся на незаконны, паводле яго, прысуд у дачыненні да ягонага сына, прызнанага вінаватым у збіцці сваёй жонкі, і каментаваў выбух у мінскім метро, да якога, паводле пенсіянера, мае дачыненні Аляксандр Лукашэнка.

У красавіку суд Фрунзенскага раёна прызнаў Лапіцкага вінаватым і пастанавіў накіраваць яго на прымусовае лячэнне, бо экспертыза паказала, што ў мужчыны хранічнае псіхічнае захворванне. Мянчук паспрабаваў абскардзіць рашэнне суддзі.

Паводле праваабаронцы Алега Волчака, 12 ліпеня падчас паўторнага разгляду справы ў суд быў запрошаны адзін з чатырох экспертаў у галіне псіхіятрыі, які раней даваў заключэнне аб псіхічным стане Аляксандра Лапіцкага. «Мы так і не атрымалі ад псіхіятра адказу, у чым выяўлялася, як ён сцвярджае, «трызненне» Лапіцкага», — адзначыў праваабаронца.


Праваабаронцы ўпэўненыя, што рашэнне суддзі накіраваць Лапіцкага на стацыянарнае псіхіятрычнае лячэнне пад асаблівым кантролем незаконнае.

Аляксандр Лапіцкі збіраецца абскардзіць гэтае рашэнне ў Мінскім гарадскім судзе.


belsat.eu



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: