За месяц пасля пажару ў Будславе сабралі больш за 700 тысяч рублёў

Пажар у касцёле ў Будславе здарыўся роўна месяц таму, 11 траўня. Дах Нацыянальнага санктуарыя Маці Божай Будслаўскай быў цалкам знішчаны пажарам — ад яго засталося толькі вуголле, нагадвае «Наша Ніва».
Фота часовага даху. budslau.by

Фота часовага даху. budslau.by

Плошча даху — 1816 квадратных метраў. Пакрыць яе дрэвам так, як гэта было да пажару, хутка немагчыма, таму зараз вядуцца працы па ўсталяванні часовага даху з металу, паведамілі ў парафіі.

Пробашч Дзмітрый Дубовік распавёў, што самым цяжкім быў першы тыдзень пасля здарэння.

— Ішлі моцныя дажджы і вельмі сур’ёзна залівалі скляпенні касцёла. Цяпер усё падсыхае, а мы робім часовы дах. Сумесна з інжынерамі таксама прыдумалі сістэму, што дапамагае адвесці на вуліцу ваду, якая залілася у касцёл.

Пасля пажару адно з самых праблемных месцаў у касцёле — купал з цэглы: ёсць рызыка, што ён можа асыпацца.

— Інжынеры разлічваюць, як зрабіць страхоўку для гэтага купала, якая дапаможа яго умацаваць. Менавіта з-за купала уваход у касцёл цяпер забаронены для ўсіх жадаючых. Знаходзіцца ў храме можна толькі тым, хто прымае ўдзел у супрацьаварыйных працах, — тлумачыць ксёндз. — У нас ёсць стары невялікі касцёл з асобным уваходам, але і туды уваход закрыты. Мы не маем права запусціць людзей, пакуль не будзе поўнай упэўненасці ў бяспецы.

У першы дзень пасля пажару быў адкрыты збор сродкаў на аднаўленне касцёла. На 10 чэрвеня сабрана 734 896 руб. Збор працягваецца. Дапамагаць касцёлу таксама прыязджаюць валанцёры з усёй Беларусі, былі нават памочнікі з Брэста і Гомеля.

— Жадаючых дапамагчы насамрэч шмат. І валанцёры, і парафіяне зрабілі даволі вялікі кавалак працы на пачатку. Альпіністы скідалі згарэлыя канструкцыі, што заставаліся зверху, сабралася каля 10 прычэпаў вуголля, разам мы працягваем рабіць іх сарціроўку. Аднак самае складанае пачынаецца цяпер, калі неадкладныя працы заканчваюцца і пачынаюцца звычайныя, звязаныя з дакументамі, з тым, што трэба шукаць розных падрадчыкаў.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: