Журналіст БелаПАН падаў у суд на Савет Рэспублікі

Карэспандэнт БелаПАН Уладзімір Лапцэвіч накіраваў скаргу ў суд Ленінскага раёна Мінска на неправамерныя дзеянні супрацоўнікаў Савета Рэспублікі.


Журналіст звяртаецца з іскам аб прызнанні таго, што дзеянні службовых асоб Савета Рэспублікі, якія прынялі рашэнне аб адмове ў яго акрэдытацыі на пасяджэнне Міжпарламенцкай камісіі Савета Рэспублікі і Савета Федэрацыі па міжрэгіянальным супрацоўніцтве падчас правядзення V “Форума рэгіёнаў” Беларусі і Расіі ў Магілёве, супярэчаць заканадаўству.

Лапцэвіч просіць суд абавязаць Савет Рэспублікі прынесці яму і інфармацыйнай кампаніі БелаПАН прабачэнні за неправамерныя дзеянні службовых асоб, якія парушылі права журналіста на атрыманне інфармацыі.

Журналіста недзяржаўнага інфармагенцтва БелаПАН Уладзіміра Лапцэвіча спачатку акрэдытавалі, а пазней адмовілі ў магчымасці прысутнічаць на мерапрыемствах “Форума рэгіёнаў”, які праходзіў у Магілёве 10-12 кастрычніка 2018 года.

Лапцэвіч некалькі разоў звяртаўся ў Савет Рэспублікі з просьбамі патлумачыць, на якой падставе яму было адмоўлена ў акрэдытацыі, аднак нейкага зразумела адказу не атрымаў.

— Мае спробы дамагчыся ад Савета Рэспублікі ўцямнага тлумачэння, чаму мне было адмоўлена ў акрэдытацыі, хто прымаў такое рашэнне і на падставе чаго яно было вынесена не ўвянчаліся поспехам. Спасылкі начальніка сакратарыята Савета Рэспублікі на тое, што там нібыта раптам стала не хапаць месцаў для журналістаў, а таксама спасылкі старшыні пастаяннай камісіі па адукацыі, навуцы, культуры і сацыяльным развіцці Савета Рэспублікі на нейкія тэхнічныя прычыны смехатворныя і не могуць прымацца ўсур'ёз.

Таксама мне не быў дадзены адказ на тое, якім чынам праходзіла працэдура акрэдытацыі журналістаў на дадзены Форум, які ўпаўнаважаны орган яе праводзіў, не была прадастаўлена запытаная мною копія рашэння аб акрэдытацыі мяне на Форум, а ў далейшым і копія рашэння аб адмове ў дадзенай акрэдытацыі”, — адзначае ў звароце ў суд Лапцэвіч.

Журналіст мяркуе, што рашэнне аб адмове ў акрэдытацыі з'яўляецца не абгрунтаваных ніякімі законнымі падставамі і супярэчыць закону аб СМІ, у якім гаворыцца аб недапушчэнні неабгрунтаванага адмовы ў акрэдытацыі журналістаў сродкаў масавай інфармацыі.

— Я лічу, што дзеянні службовых асоб Савета Рэспублікі з'яўляюцца неправамернымі і парушаюць маё права журналіста на атрыманне, захоўванне i распаўсюджванне інфармацыі. Пасля таго, як у апараце Савета Рэспублікі мне не змаглі даць хоць нейкіх зразумелых тлумачэнняў, на якой падставе мне было адмоўлена ў акрэдытацыі, я быў проста вымушаны звярнуцца са скаргай у суд”, — распавёў Уладзімір Лапцэвіч карэспандэнту службы маніторынгу БАЖ.


Хочаце ведаць больш? Сачыце за нашымі публікацыямі ў Telegram і Facebook!