ByMetal: «Наша місія – падтрымка метал-плыні і ўнясенне ў яе беларушчыны»

У мінскім клубе Brugge 18 траўня пройдзе канцэрт з нагоды дзесяцігоддзя руху ByMetal. Выступяць гурты Forodwaith, Nebulae Come Sweet, In Search For, Dymna Lotva, Сымон-музыка, Alfar. Што такое рух ByMetal распавядае заснавальнік аднайменнага сайта Ян Мачульскі.

– ByMetal – мая справа жыцця. Праект пачаўся 15 траўня 2008 года. Дакладней, у ноч з 14-га на 15-га. Таму фактычна нам ужо 11 гадоў. Але летась не адсвяткавалі, сёлета наганяем. ByMetal (спачатку BelMetal) – гэта была мая спроба стварыць нешта сваё, новы рух у цяжкой металічнай плыні. Тады было шмат іншых падобных рухаў. Спачатку працаваў форум, з 2011 года – сайт BelMetal.org. Мы арганізоўвалі канцэрты, і ў малых клубах, і на буйных open-air пляцоўках. Напрыклад, фестываль Burning Wheel у Малінаўцы, з гуртом Gods Tower за хэдлайнера, у 2013-м.

У 2017 годзе зрабілі рэбрэндынг і адкрылі новы сайт ByMetal.org. “Bel” у міжнародным разуменні асацыюецца з Бельгіяй, а назва “ByMetal” – больш гучная і сапраўды ўнікальная. Яна адпавядае англамоўнаму пазначэнню Беларусі, дазваляе гуляцца сэнсамі: “каля металу”, “металам”. На сайце самае цікавае для людзей – гэта фотарэпартажы. Найбольшы інтарэс выклікаюць справаздачы з канцэртаў сусветна вядомых гуртоў. Напрыклад, Amorphis посцілі ў сваім Інстаграме нашы фота, дзякавалі нам. Калі параўноўваць з лакальным, беларускім матэрыялам – гэта зямля і неба. Замежныя гурты маюць больш аўдыторыі і на канцэртах. Людзі глядзяць фотарэпартажы з падзей, якія яны наведалі, а тыя, хто не быў – таксама цікавяцца. Наша мэта – данесці, як гэта было, перадаць атмасферу. Паказаць твары публікі.

Праект ByMetal некамерцыйны, таму прагляды для нас – гэта ў першую чаргу адваротная сувязь. Мы бачым, што недзе цікаўнасць больш, а недзе менш, але гэта ўсё роўна трэба рабіць. Таму падтрымліваем усё: рэлізы нават самых дробных гуртоў. Не бярэм толькі зусім сыры матэрыял, нестудыйныя працы.

Наша місія – падтрымка метал-плыні і ўнясенне ў яе беларушчыны.

Фотарэпартажы займаюць менш часу, чым публікацыя тэксту. На сайце прыняты свой, спецыфічны варыянт тарашкевіцы. Артыкул кожнага аўтара трэба вычытаць, адрэдагаваць, выставіць… Таму ў большасці выпадкаў ад тэкставых рэпартажаў з канцэртаў мы цяпер адмаўляемся. Бывае, ставім інтэрв’ю, рэцэнзіі. Усе нашыя фатографы працуюць “за ідэю”, не заўсёды знаходзяцца такія ж альтруістычныя відэааператары. Бывае, ставім на сайт відэа, але не так часта, як нам бы хацелася. Мы вельмі ганарымся сваёй афішай, яна адна з самых поўных у нашай тэматычнай галіне. Хочацца, каб сайт быў сапраўдным сервісам, карысным людзям.
Мы сталеем, і разам з намі аўдыторыя, у нас шмат чытачоў ва ўзросце 25 – 35 гадоў. Але не цураемся і самых моладзевых стыляў, пашыраем кола прыхільнікаў. Раней у нас быў “металёвы метал”, а цяпер канцэпцыя шырэйшая. Назва ByMetal дазваляе легітымізаваць шырэйшае кола тэм “каля металу”, усю цяжкую плынь, не толькі так званы олдскульны метал. Падтрымліваем фальклорныя і рэканструктарскія імпрэзы. Гэта ўсё парасткі адной культуры.



Сёлета мы вырашылі вяртацца ў плынь арганізацыі канцэртаў. Гэта ўжо не першы Travień Fest, што мы робім. У 2014-м хацелі закласці ў беларускі музычны асяродак новае імя: ёсць жа Калядны фэст, Фэст вясновага раўнадзенства… Хацелася, каб канец вясны быў адзначаны таксама. Пасля таго ў нас канцэртных праектаў больш не было. Спадзяемся, на сёлетнім Травень-фэсце ўсё не скончыцца, будзем і далей нешта ладзіць.

Усе артыкулы і працы этнаграфіні і журналісткі НЧ Алёны Ляшкевіч чытайце на яе тэлеграм-канале.

Хочаце ведаць больш? Сачыце за нашымі публікацыямі ў Telegram і Facebook!