ByMetal Travień Fest: 10 год у плыні беларускага металу

18 траўня ў сталічным клубе Brugge адбудзецца святочны канцэрт з нагоды дзесяцігоддзя руху ByMetal. Наведвальнікаў чакае выступ знакавых гуртоў беларускай цяжкай сцэны: Forodwaith, In Search For, Nebulae Come Sweet, Alfar, Dymna Lotva, Сымон-музыка… ды іншыя сюрпрызы.

10 год таму на бясплатным сэрвісе згуртаваўся беларускі форум прыхільнікаў цяжкай музыкі, які праз 3 гады перарадзіўся ў адзін з самых гучных нефармальных СМІ – партал BelMetal, пазней змяніўшы назву на ByMetal. Увесь гэты час праект асвятляе навіны беларускай метал-сцэны, падтрымлівае айчынныя каманды і нацыянальную культуру.

ByMetal Travień Fest 2019 – вяха музычнага руху нефармальнай Беларусі. Гэта свята, на якім няма выпадковасцяў. Склад удзельнікаў падабраны з выбітных калектываў, кожны з якіх прадставіць унікальную праграму.

• Віцябляне Forodwaith – нячастыя і заўсёды жаданыя госці ў сталіцы, летась паспяхова выступілі з сольным канцэртам, сабраўшы поўны клуб прыхільнікаў – гэтым разам зноў у Мінску, адмыслова для ByMetal Travień Fest з улюбёнымі хітамі і навінкамі!

• In Search For – прог-метал праект таленавітага кампазітара і выканаўцы Яна Жанчака. Упершыню за доўгі час Ян выступіць менавіта з In Search For, прэзентаваўшы нашумелы леташні альбом "Atonement Pt.1" і дадаўшы да праграмы лепшыя песні свайго сольнага праекту Yann Zhanchak.

• Nebulae Come Sweet – адныя з самых загадкавых, неадназначных і тямнічых нашых музыкаў – гэты post-metal/doom metal праект, спазнаўшы замежнай славы і прызнання на радзіме, напярэдадні выпуску новага альбому адмыслова завітае на ByMetal Travień Fest і эксклюзіўна прэзентуе новыя трэкі і ўнікальную акустычную праграму.

• Alfar – мінская melodic death metal фармацыя скандынаўскага разліву, адметная ўнушальнай прадукцыйнасцю за нядоўгі тэрмін існавання, рыхтуе да ByMetal Travień Fest праграму з упорам на ўжо трэці свой альбом і прадэманструе абноўлены склад і гучанне.

• Эпатажныя і атмасферныя Dymna Lotva – асаблівая пярліна складу ByMetal Travień Fest – іхны post-black/doom metal заварожвае і паглыбляе ў самыя патаемныя пачуцці і агольвае самыя далёкія куты чалавечай душы. Гэта заўсёды дасканала прапрацаванае прадстаўленне і тэатралізаванае шоў, асаблівы падыход да кожнага новага канцэрту – застаецца толькі гадаць ды чакаць, што яны паднясуць нам зараз...

• Рэчыцкі праект Сымон-музыка, пасюль студыйны, упершыню прагучыць ужывую, менавіта на ByMetal Travień Fest! Музыкі прарабілі ўнікальную працу яшчэ ў 2011-м годзе, запісаўшы аднайменны альбом – суцэльны твор па паэме Якуба Коласа ў стылі folk metal.

Яшчэ адная адметная рыса ByMetal Travień Fest – праграмы ўсіх гуртоў будуць роўныя па часе, а праграма фестывалю будзе абвешчана напярэдадні.

Сачыце за навінамі на афіцыйнай старонцы фестывалю: bymetal.org/event/travien, а таксама ў сацыяльных сетках праз хэштэг #bymetal10.

Паводле прэс-рэлізу

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: