Мастакі з «Пагоні» правялі пленэр ля Курапатаў

Творцы з суполкі «Пагоня» Беларускага саюзу мастакоў 19 кастрычніка правялі пленэр напярэдадні выставы «Праўда пра Курапаты».
Генадзь Драздоў піша алеяй на кардоне

Генадзь Драздоў піша алеяй на кардоне

Мастакі сабраліся на полі паміж Курапатамі і «Экспабелам», дзе ў даваенны час праходзіла гістарычная «Дарога смерці» — частка грунтоўкі на Дроздава, па якой бязвінных ахвяраў вазілі на расстрэл у стары хваёвы бор на паўночна-усходнім ускрайку Мінска.  

Поле на ўсход ад Курапатаў

Поле на ўсход ад Курапатаў

Сёння дарога ўзараная, але жыхары суседніх вёсак штогод наўпрост па полі тораць сезонную сцежку, якая часткова супадае з трасаю старадаўняга шляху. Не выклікае сумневу, што траса «Дарогі смерці» мусіць быць захавана як важны элемент гістарычнага краявіду, звязанага з памяццю пра Курапаты — сімвал чырвонага тэрору ў Беларусі.


Грамадства лічыць, што запланаванае будаўніцтва Нацыянальнага выставачнага цэнтру на полі паміж урочышчам і «Экспабелам» пагражае існаванню «Дарога смерці», нягледзячы на тое, што яна ўваходзіць у ахоўную зону Курапатаў, дзе забаронена любое новае будаўніцтва апроч патрэбаў самой гістарычна культурнай каштоўнасці міжнароднага значэння «Месца згубы ахвяраў палітычных рэпрэсій 30-х-40-х гадоў XX стагоддзя ва ўрочышчы Курапаты».

 Алесь Мара намаляваў партрэты ўдзельнікаў пленэру і паказаў свае працы

Пагроза існаванню трасы «Дарогі смерці» выклікана наступным. Архітэктары прапанавалі ўсталяваць мяжу ахоўнай зоны на адлегласці ў 240 м ад ускрайку Курапацкага лесу. Такая адлегласць, на думку спецыялістаў, гарантавала б захаванасць трасы, дазваляла яе будучую мемарыялізацыю і стварала дастатковую буферную зону паміж дарогай і сучаснай забудовай з усходняга боку. Аднак у зацверджаным Міністэрствам культуры праекце зонаў аховы Курапатаў ад 1 снежня 2014 года мяжа ахоўнай зоны каштоўнасці прывязана да адсутнай сёння «Дарогі смерці» на адлегласці ад яе ў шэсць метраў на ўсход. Такім чынам, рэальна зацверджаная мяжа будзе не ў 240 м ад ускрайку Курапацкага лесу, а на 20-50 метраў бліжэй. А паколькі Мінкультуры пакінула ў нарматыўным акце прыблізную прывязку да лесу ўсходняй мяжы ахоўнай зоны ў 240 м, атрымалася, што гэтая мяжа дакладна не прывязаная і яе лакалізацыю можна аспрэчыць.

Накіды робіць Лявон Грышук

Накіды робіць Лявон Грышук

Вось чаму грамадскасць прапануе ўладам перагледзець тэрыторыю размяшчэння НВЦ і захаваць за полем паміж урочышчам і «Экспабелам» статус Месца нацыянальнай памяці.
Свой твор дэманструе Ніна Сакалова-Кубай

Працы ўдзельнікаў пленэру будуць экспанавацца на III дакументальна-мастацкай выставе “Праўда пра Курапаты”, што адчыніцца 11 лістапада ў 17.00 у фае першага паверху сталічнага Палаца мастацтва. Выстава будзе працаваць 10 дзён.






Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!