На «Агульнай дыктоўцы» будзе тэкст Андруся Горвата

Беларусы 1 чэрвеня змогуць праверыць веданне роднай мовы і напісаць «Агульную дыктоўку» па новым тэксце сучаснага беларускага пісьменніка Андруся Горвата. У якасці чытальнікаў выступяць салісты групы NaviBand. Праект у падтрымку беларускай мовы праводзіць кампанія «Лідскае піва», прымеркаваўшы яго да 400-годдзя выхаду «Граматыкі» Мялеція Сматрыцкага.
У гэтым годзе спецыяльна для «Агульнай дыктоўкі» тэкст падрыхтаваў Андрусь Горват.

Аўтар тэксту і арганізатары акцыі паставілі перад сабой мэту не толькі даць магчымасць удзельнікам праверыць свае веды, але і паказаць прыгажосць, самабытнасць і разнастайнасць беларускай мовы.

У ролі «настаўнікаў» на «Агульнай дыктоўцы» выступяць салісты групы NaviBand. Выбар чытальнікаў невыпадковы: музычны бэнд першым у гісторыі «Еўрабачання» выканаў кампазіцыю на беларускай мове і актыўна выкарыстоўвае мову ў сваёй творчасці і зносінах з прыхільнікамі.

Напісаць дыктоўку можна ў Нацыянальнай бібліятэцы або дома. Неабходна толькі загадзя зарэгістравацца на старонцы праекта. Сама дыктоўка пачнецца 1 чэрвеня роўна ў 12:00 і будзе транслявацца на радыё «Культура» (102,9 FM у Мінску, 88,5 FM у Брэсце, 99,3 FM у Віцебску, 91,5 FM у Гомелі, 95,0 FM у Гродне і 99,1 FM у Магілёве).

Правераць працы прафесійныя філолагі. Вынікі дыктоўкі будуць высланы кожнаму індывідуальна разам з электронным сертыфікатам аб удзеле. Для жадаючых праверыць сябе самастойна арыгінал тэксту апублікуюць на старонцы праекта на працягу некалькіх дзён пасля дыктоўкі. Выдатнікі дыктоўкі атрымаюць памятныя прызы ад арганізатараў.

naviny.by


Хочаце ведаць больш? Сачыце за нашымі публікацыямі ў Telegram і Facebook!