На Дзень святога Патрыка прэзентаваны ірландскі мультфільм у беларускай агучцы

Прэм'ера ірландскага мультфьма «Таямніца Келза» ў прафесійнай беларускай агучцы адбылася 17 сакавіка ў сталічным кінатэатры "Масква". 

Магчымасць глядзець сусветнае кіно на роднай мове ў кінатэатрах беларусы атрымалі дзякуючы праекту «Беларускія ўікенды» і яго афіцыйным партнёрам «Атлант Тэлекам» і velcom.

Дзень святога Патрыка Ірландыя, а разам з ёю ўвесь свет, адзначае 17 сакавіка. Таму магчымасць паглядзець мультфільм ірландскага рэжысера ў беларускай агучцы стала для гледачоў выдатным спосабам не толькі адзначыць міжнароднае свята, але і аддаць належнае беларускай культуры.

Галоўны герой, хлопчык Брэндан, жыве ў абацтве Келз. Неўзабаве ў гэтае абацтва прыбывае славуты асветнік Эйдан з нейкай таямнічай кнігай… У далейшых прыгодах будуць удзельнічаць не толькі яны, але і чароўная дзяўчынка Ашлінг з лесу, і кот Эйдана Пангурбан. Крытыкі па ўсім свеце з захапленнем сустрэлі «Таямніцу Келза». Стужка была адзначана шэрагам узнагарод і намінацый, уключна з намінацыяй на «лепшы анімацыйны фільм» прэміі Оскар.


«Праект «Беларускія ўікенды» пачынаўся як прыватная ініцыятыва — разам з маім сябрам Паўлам Харланчуком мы вырашылі перакладаць фільмы на беларускую мову і агучваць іх, бо адчувалі, што гэтага тое, чаго не хапае ўсім беларусам. Зараз у нас ёсць творчая каманда аднадумцаў, а таксама спіс з 20 агучаных фільмаў. Але для паспяховага развіцця праекту нам неабходны быў партнёр, які б не толькі мог падтрымаць нашу ідэю, але таксама падзяляў бы нашы погляды і каштоўнасці. Мы вельмі рады, што партнёрамі сталі менавіта «Атлант Тэлекам» і velcom, таму што нам блізкая філасофія гэтых брэндаў», — адзначыў кіраўнік праектаў «Кінаконг» і «Беларускія ўікенды» Андрэй Кім.



Зараз каманда праекта «Кінаконг» аб’ядноўвае шэраг прафесійных акцёраў. Сярод іх — Павел Харланчук, Ганна Хітрык, Алесь Маўчанаў, Уладзімір Глотаў, Сяргей Жбанкоў. У 2016 годзе у межах праекта гледачам былі прадстаўлены 10 фільмаў.

«Папулярызацыя беларускай мовы і культуры — гэта наша агульная мэта, тое, што аб’ядноўвае брэнды «Атлант Тэлекам», velcom і праект «Беларускія ўікенды». Таму наша першасная задача як партнёраў – зрабіць так, каб праект набыў вялікі размах і стаў агульнавядомым», — адзначыў начальнік адзела карпаратыўных камунікацый velcom Вячаслаў Смірноў.


«Атлант Тэлекам» і velcom плануюць фінансаваць агучванне фільмаў для праекта «Беларускія ўікенды». Акрамя гэтага, частка агучаных у межах праекта стужак з’явіцца на сервісах інтэрактыўнага тэлебачання «Атлант Тэлекам» і voka. А неўзабаве праект «Беларускія ўікенды» набудзе рэспубліканскі размах. Паказы, аналагічныя тым, што ладзяцца для мінскіх гледачоў, распачнуцца ў кінатэатрах абласных цэнтраў, а потым і іншых гарадоў Беларусі.

Наступныя паказы мультфільма «Таямніца Келза» адбудуцца 18 і 19 сакавіка ў 17:00 таксама ў кінатэатры «Масква». Падрабязнасці на сайце kinakong.by, білеты ў касах кінатэатра і на bycard.by.

Паводле пост-рэлізу

Хочаце ведаць больш? Сачыце за нашымі публікацыямі ў Telegram і Facebook!