Вядомы кінакрытык выступіў супраць цэнзуры

Кінакрытык Андрэй Расінскі на сваёй старонцы ў Фэйсбуку надрукаваў зварот да кінаграмадскасці, гледачоў і міжнароднай супольнасці  з патрабаваннем скасаваць "цэнзуру кінаненавіснікаў" і адправіць іх "у глыбокую адстаўку".
Ілюстрацыйнае фота, pixabay.com

Ілюстрацыйнае фота, pixabay.com

У звароце адзначаецца, што "ўсталяванне міністэрскай цэнзуры над Нацыянальным конкурсам “Лістапад” пагражае знішчыць самую буйную міжнародную кінапляцоўку Беларусі. У фестываляў ёсць свае цвёрдыя правілы, і галоўнае з іх – незалежнасць адбору, адмененае міністэрскімі чыноўнікамі. Некампетэнтным чыноўніцам і чыноўнікам, якія ненавідзяць кіно так жа моцна, як і не ведаюць, месца не ў культуры, а ў глыбокай адстаўцы".

Нагадаем, што 23 кастрычніка, падчас прэс-канферэнцыі "Лістапада" стала вядома, што цяпер дырэкцыя фестывалю не будзе прымаць удзел у выбары фільмаў для нацыянальнага конкурсу. Канчатковае рашэнне будзе за камісіяй, на чале якой — першы намеснік міністра культуры Ірына Дрыга. 

Пасля гэтага Андрэй Расінскі прапанаваў байкатаваць "Лістапад". Але ў выніку ўдзельнічаць у фестывалі адмовіліся толькі Ева-Кацярына Махава і Дзяніс Пуцікаў — аўтары дакументальнага фільма "Перазімаваць".

Андрэй Расінскі заклікае іншых мастакоў падтрымаць свабоду творчасці і свабоднае кінажыццё ў Беларусі і прапануе ўсім, хто згодны, падпісацца пад яго пастом у каментарах.

"Фестывалю – ягоныя паўнамоцтвы, кінематографу – свабоднае развіццё!
Не – цэнзуры кінаненавіснікаў!
Жыве беларускае кіно!"


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: