«Нулявуд» — новы фільм Джэймса Франка выходзіць па-беларуску адначасова з сусветнай прэм’ерай

У сусветны пракат 13 верасня выходзіць новы фільм Джэймса Франка Zeroville, а ўжо 19 верасня ў Мінску ў кінатэатрах VOKA CINEMA і Silver Screen прэм’еру прадставяць на беларускай мове. У агучцы «Нулявуда» ад «Тутэйшын Студыі» ўзялі ўдзел вядомыя артысты і музыканты.



Галоўныя героі гавораць з экрана галасамі вядомых акцёраў беларускіх тэатраў — Алега Гарбуза, Крысціны Дробыш, Андрэя Мілюхіна, Таццяны Ружаўскай. У агучцы таксама ўдзельнічалі музыканты — Аляксандр Памідораў, Бенька, Ілля Чарапко, Дзядзя Ваня. Жаргон, жарты, лаянка (а фільм 18+) — усё гэта было захавана і ў перакладзе на беларускую мову. Асобнае задавальненне — у гуку: упершыню беларускі пераклад з мовы арыгіналу можна будзе пачуць у прынцыпова новым аб’ёмным фармаце 5.1.

Галоўны герой па мянушцы Пастар — аўтычны выпускнік духоўнай семінарыі — згодна з адукацыяй мусіў стаць архітэктарам цэркваў, але вырашае прысвяціць сваё жыццё кіно. Пагаліўшы галаву і зрабіўшы на ёй тату герояў культавай меладрамы «Месца пад сонцам», у 1969 годзе ён прыязджае ў Галівуд. У гэты час там пануюць секс, наркотыкі і панк-рок. Паліцыя расследуе забойства жонкі Рамана Паланскі сектай Чарльза Мэнсана, легендарныя кінастудыі, што падаваліся несакрушальнымі, пераносяць крах, а на арэну выходзяць новыя рэжысёры, гатовыя парушаць любыя правілы: Фрэнсіс Форд Копала, Сцівен Спілберг, Марцін Скарсэзэ і Джордж Лукас. Пастар уладкоўваеца працаваць дэкаратарам, затым вучыцца мантажу, паступова набывае рэпутацыю прафесіянала, прызнанне і нават атрымлівае ўзнагароду ў Венецыі, але ў выніку ўсё заканчваецца трагедыяй.

Дарэчы, здымкі эпізоду ўзнагароджання праходзілі падчас рэальнай цырымоніі Венецыянскага кінафестывалю ў 2013 годзе: яго былы дырэктар Альберта Барбера абвясціў перад публікай, што ўручае прыз нейкаму містэру Джэрому. А сам Джэймс Франка ў вобразе свайго персанажа прайшоўся перад гэтым па чырвоным дыванку.

Фільм быў гатовы яшчэ ў 2014 годзе, але з-за праблем кампаніі-пракатчыка яго прэм’ера зацягнулася. За гэты час Джэймс Франка паспеў выпусціць сваю наступную карціну «Гора-творца» і атрымаць за яе намінацыю на «Оскар», а таксама «Залаты глобус» за акцёрскую работу ў гэтым фільме.

Прэм’ера, якую чакалі пяць гадоў, усё ж такі адбудзецца. Дзякуючы новаму сумеснаму праекту відэасервіса VOKA і сеткі кінатэатраў Silver Screen Cinemas — «Тутэйшын Студыя» — мы зможам убачыць «Нулявуд» на беларускай мове.


«Тутэйшын Студыя» створана для таго, каб жыхары Беларусі маглі глядзець апошнія навінкі сусветнага кіно на роднай мове паралельна з прэм’ерамі ў іншых краінах. Прынцыпам новай студыі агучкі заяўлена вера ў тое, што беларуская мова — выдатны інструмент для таго, каб атрымаць яшчэ больш задавальнення ад прагляду кіно.

Сачыце за прэм’ерамі ў агучцы ад «Тутэйшын Студыi» на сайце.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: