Споведзь гурта Naka: каманда выдае першы цалкам беларускамоўны альбом "Мая малітва"

Гурт Naka выпускае ў свет свой першы цалкам беларускамоўны альбом "Мая малітва", праца над якім стала сапраўдным выпрабаваннем.



Работа над альбомам пачалася падчас суда па пазове Алега Моўчана супраць Насты Шпакоўскай за выкананне мулявінскай "Малітвы", за год стварэння альбома істотна абнавіўся склад гурта. Канцэртная прэзентацыя адбудзецца 8 сакавіка ў клюбе RE: PUBLIC.

"З гэтага выпрабавання мы выйшлі годна, сталі больш дарослымі па светаадчуванні, як пасля сапраўднай споведзі, больш узнёслыя і глыбокія, — кажа лідарка Naka Наста Шпакоўская. — Гэты альбом не супраціў ці даніна модзе на беларускасць. Ён пра любоў, душу і шчырасць. І гэта наш адказ на спробы "прыватызаваць" тое, што належыць усім, як, напрыклад, малітва".

Амаль усе песнi напісаныя адмыслова для гэтага альбома. Слухач знойдзе тут знаёмую "Музу" на верш Алеся Плоткі, і не адразу пазнае "Чакаем", якая здабыла электроннае гучанне замест традыцыйнага акустычнага. Калектыў па-новаму паклал на музыку верш Янкі Купалы "Мая малітва" і ўключыў у альбом песню "Ты пакліч мяне" на верш паэткі Яўгеніі Янішчыц. Нечаканым зрабіўся дуэт са Стасам Мытнікам (гурт «Акute») — песня «Не адпускай». Яшчэ адна адметнасць новага альбома — песня "Пра любоў", якая гучыць адразу на трох мовах — беларускай украінскай і рускай. Песня сталася своеасаблівым антываенным заклікам ад Naka, і раскладзеная на тры жаночыя галасы. Разам з Настай Шпакоўскай яе выконваюць Ганна Хітрык (гурт «Sounduk») і Святлана Бень (гурт «Серебряная Свадьба»). Гэтыя ж тры спявачкі зняліся ў кліпе "Пра любоў".

Гурт Naka таксама прэзентаваў відэаролік "Мая малітва", вядзецца праца над відэа на песню "Трывай". Naka рыхтуе канцэртны рэліз альбома на 8 сакавіка 2016-га года. Канцэрт адбудзецца ў клубе Re:Public і стане прэзентацыяй не толькі альбома, але і двух новых музыкаў у камандзе.

"Гэта пяты студыйны альбом Naka, песні да якога пісаліся лёгка. Аднак яго шлях да слухачоў ня быў просты, як не бывае простай кожная глыбокая і засяроджаная справа. Мы спадзяемся, што разам з намі ў шлях самадасканалення ў шырокім сэнсе выправяцца і слухачы "Маёй малітвы", — дадае Наста Шпакоўская.

Даведка:

Гурт Naka творыць ужо 11 год. За гэты час каманда выпусціла 4 альбомы: «Тебе», «Пора», «Довольна», «Naka-piano", каля 20-ці відэакліпаў, дала канцэрты ў Беларусі, Расіі, Украіне і Літве, прыняла ўдзел у буйных фестывалях, сярод якіх "Крылья", «Окна открой», «Навальніца», "Нашествие". Салістка Наста Шпакоўская ў 2010 годзе атрымала тытул «Рок-княжна» цырымоніі ўзнагароджання лепшых рок-музыкаў Беларусі «Рок-каранацыя». На 2016 год запланаван рэліз беларускамоўнай плыткі, вядзецца праца над новымі песнямі.

www.naka.by

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: