Што чакае акцёраў, якія адмовіліся граць з салідарнасці з затрыманым калегам

У Гродзенскім драмтэатры 20 верасня давалі «Вельмі простую гісторыю». П’еса перапынілася на палове. У гэты час акцёры даведаліся, што іх калегу, заслужанага артыста Беларусі, акцёра і рэжысёра Сяргея Курыленку, затрымалі падчас мірнай акцыі.

Адна са сцэн спектакля «Вельмі простая гісторыя». Фота з сайта Гродзенскага драмтэатра


«Калі мы даведаліся, што затрымалі Курыленку з жонкай, акцёры не маглі працягваць спектакль. Гэта стала для іх шокам, — распавёў Hrоdna.life адзін з супрацоўнікаў тэатра. — Акцёры патлумачылі ўсё гледачам, папрасілі прабачэння і сышлі са сцэны. Іх праводзілі апладысментамі».

Частка гледачоў звярнулася ў касу тэатра з просьбай вярнуць грошы за спектакль, што не адбыўся. Іх просьбу задаволілі. Інфармацыю аб колькасці вернутых квіткоў у тэатры не раскрываюць.

Сяргея Курыленку вызвалілі праз некалькі гадзін. Акцёраў, якія спынілі спектакль, чакала «размова» з дырэктарам тэатра. Да яго прыйшлі ўсе, хто быў задзейнічаны ў спектаклі: і акцёры, і прадстаўнікі тэхнічных службаў. Дырэктару патлумачылі, што гэта было агульнае рашэнне.

Аб тым, ці будзе кіраўніцтва тэатра прымаць меры ў адносінах да калектыву, пакуль невядома. Да аўторка 22 верасня ў адміністрацыі выхадныя. У суботу загадаў аб пакаранні не было.

«Магчыма, заўтра, калі ўсе выйдуць на працу, штосьці праясніцца. У тэатры ёсць практыка, што акцёры кампенсуюць кошт вернутых квіткоў, калі спектакль зрываецца па іх віне. Але пакуль канкрэтнай размовы не было», — распавяла Hrodna.life крыніца ў тэатры.

Таксама Hrodna.life стала вядома, што знайшоўся мецэнат, які прапанаваў дапамогу на такі выпадак. «Ужо ёсць чалавек, які гатовы кампенсаваць усю неабходную суму», — паведаміла крыніца Hrodna.life у драмтэатры.

Што будзе з акцёрамі, якія спынілі спектакль, пакуль невядома. Дырэктар драмтэатра Ігар Гедзіч пракаментаваў сітуацыю grodnonews.by.

— Тэатр павінен заставацца па-за палітыкай, непрымальна сцэну выкарыстоўваць для дэманстрацыі сваіх палітычных перакананняў. Тут павінны разыгрывацца іншыя мізансцэны — з Шэкспіра, Мальера, Гладзіліна … — адзначыў кіраўнік. — Яшчэ на першым курсе будучых акцёраў вучаць, выходзячы на сцэну, забываць пра ўсё, што па-за ёй. На жаль, некаторыя нашы акцёры гэтыя пастулаты парушаюць. Трэба быць прафесіяналам у сваёй справе і, калі выходзіш на сцэну, аддавацца гледачу. Акрамя таго, мы адчуваем запыт гледача. І глядач стаміўся, ён хоча адпачыць ад паўсядзённых праблем і клопатаў. І калі мы грэбуем яго інтарэсамі, гэта непавага да гледача. Тым самым мы адпужваем нашых гледачоў і пілуем ножку крэсла, на якім сядзім. Гледача трэба паважаць, шанаваць ім, — адзначыў кіраўнік grodnonews.by. — Пра гэта я з калегамі размаўляў і буду размаўляць.

Што тычыцца акцёраў, якія спынілі спектакль, пытанне будзе вырашацца.

— Ёсць нарматыўна-прававая база, Працоўны кодэкс. Рашэнне, якое будзе зваротнай рэакцыяй на ўчынак, будзе ляжаць у галіне прававога поля. Спадзяюся, што глядач, якога мы вольна або мімаволі пакрыўдзілі, з разуменнем паставіцца да гэтай сітуацыі і па- ранейшаму будзе любіць тэатр і хадзіць сюды за пошукам вечнага і прыгожага. Напружанасць у грамадстве, агрэсія павінны сысці. Трэба берагчы нашу краіну, горад, свае сем'і і сыходзіць ад канфрантацыі, — сказаў кіраўнік.

 

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: