У Мінску будзе прэзентавана новая кніга Валянціны Аксак

Літаратурны музей Петруся Броўкі запрашае 13 снежня на прэзентацыю новай кнігі Валянціны Аксак «Кава ў арліным гнязьдзе».

Валянціна Аксак – беларуская паэтэса, журналістка, член Саюза беларускіх пісьменнікаў, лаўрэат прэміі “Залаты апостраф” (2008). Аўтарка кніг паэзіі, сярод якіх – “Віно з Каліфорніі” (2003), “Дзікая сьліва” (2015), “Завінены рай” (2017).

У новай кнізе “Кава ў арліным гнязьдзе” – амаль поўнае зліццё аўтарскага голасу з наўкольнымі зыкамі: шаргаценнем лістоты, яблыкападам, рэхам здзічэлых садоў. Але найперш – з птушынымі спевамі. І пераўвасабленнем ва ўлюбёных арлоў, шлюбныя гульні якіх выкрасаюць у небе абрысы васьмёрак. Восем – лічба, за якою бясконцасць. “Кава ў арліным гняздзе” – восьмая кніга паэткі.

Дзякуючы цудоўнаму аздабленню мастака Генадзя Мацуры, кніга зацікавіць нават тых, хто не чытае вершаў. Графіка слыннага майстра не проста дакладна перадае ўнутраную сутнасць словаў, а ўспрымаецца як галерэя самастойных мастацкіх твораў.

На прэзэнтацыі чакаем выступы гасцей імпрэзы — філосафа Валянціна Акудовіча, пісьменніка, старшыні Саюза беларускіх пісьменнікаў Барыса Пятровіча, літаратурнага крытыка Ціхана Чарнякевіча, рэдактара кнігі Аляксандры Макавік, мастака Генадзя Мацуры.

Уваход вольны!

Месца правядзення: Літаратурны музей Петруся Броўкі (г. Мінск, вул. К.Маркса, 30). Пачатак у 18.30. 

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: