БНФ падала скаргі на фармаванне участковых камісій ва ўсе суды Мінску

Мінская гарадская арганізацыя Партыі БНФ падала скаргі на фармаванне ўчастковых выбарчых камісій ва ўсе дзевяць раённых судоў горада Мінску.
narodny.org

narodny.org

Як паведамляе управа Партыі БНФ, агулам структуры БНФ вылучалі 194 прадстаўнікі ў склад выбарчых камісій участковага ўзроўню: праз партыйныя арганізацыі ў склад камісій было накіравана 109 прадстаўнікоў БНФ, яшчэ 85 чалавек былі вылучаныя ад мясцовых арганізацый грамадскага аб’яднання БНФ «Адраджэньне».

Аднак, у склад участковых камісій былі ўключаныя толькі тры прадстаўнікі Партыі БНФ, а астатнім было адмоўлена. У тым ліку ў Мінску раённыя адміністрацыі адмовілі ва ўключэнні ў склад участковых выбаркамаў усім 95 прадстаўнікам, якія вылучаліся ад БНФ – 44 ад Партыі БНФ і 49 ад грамадскага аб’яднання БНФ «Адраджэньне». У выніку ў Мінску няма ніводнага прадстаўніка апазіцыі ва ўчастковых камісіях.

У скаргах, пададзеных у дзевяць раённых судоў Мінску, Партыя БНФ сцвярджае, што неўключэннем у склад камісіяў прадстаўнікоў партыі ўлады парушылі правы Партыі БНФ на ўдзел у выбарах, гарантаваныя часткай 1 артыкула 21 Закона Рэспублікі Беларусь «Аб палітычных партыях».

Першай будзе разгледжаная скарга на рашэнне пра фармаванне камісій ў Фрунзенскім раёне, якое атрымала вялікі грамадзкі рэзананс праз трансляцыю ў этэры перамоваў сябраў адміністрацыі датычна кандыдатур, што вылучаліся з ініцыятывы грамадсскасці насуперак жаданню адміністрацыі.

Разгляд скаргі Партыі БНФ на фармаванне ўчастковых камісій па Фрунзенскім раёне прызначаны ў Фрунзенскім раённым судзе на 29 чэрвеня, пачатак а 12.30, суддзя Алеся Гузоўская. Інтарэсы партыі ў судзе будзе прадстаўляць сябра Сойму Юрый Чавусаў.

Апроч дзевяці раённых судоў Мінску, скаргі на фармаванне ўчастковых камісій пададзеныя БНФ ў Віцебску, Гродне, Слоніме і ў іншых гарадах, дзе прадстаўнікоў БНФ не дапусцілі ў склад камісій. Згодна з артыкулам 34 Выбарчага кодэкса, суды павінныя разгледзець скаргі на фармаванне выбарчых камісіяў цягам трох дзён.

Агулам па ўсёй краіне ва ўчастковыя выбарчыя камісіі патрапілі толькі шасцёра прадстаўнікоў апазіцыі – па тры чалавекі ад Партыі БНФ і БСДП «Грамада».

На мінулых прэзідэнцкіх выбарах у 2015 годзе ва ўчастковыя камісіі было вылучана 96 прадстаўнікоў Партыі БНФ і 51 прадстаўнік Грамадскага аб’яднання БНФ «Адраджэньне», аднак у склад камісій былі ўключаны толькі тры сябры БНФ. На мінулагодніх парламенцкіх выбарах улады ўключылі ва ўчастковыя камісіі толькі пяцёх з 250 вылучэнцаў ад БНФ.

Як адзначае намеснік старшыні БНФ Зміцер Салошкін, татальная зачыстка участковых камісій ад апазыцыі зьвязаная з памкненнем зрабіць немагчымым грамадскі кантроль за працэсам падрыхтоўкі выбараў і падліку галасоў:

«Як і на папярэдніх выбарах у 2015 годзе, улады цяпер таксама ўключылі ў камісіі толькі трох прадстаўнікоў БНФ. Гэта вельмі нізкі паказчык, вылучэнцы ад лаяльных уладам арганізацыяў уключаныя ў камісіі амаль на сто адсоткаў. Гэта сьведчыць пра тое, што сёлетнія выбары прэзідэнта адбудуцца ў закрытым ад грамадскасці рэжыме. Пры такіх абставінах мы не можам давяраць працы камісіяў, якія сфармаваныя ў складзе, цалкам падкантрольным выканаўчай уладзе», – сказаў Зміцер Салошкін.

Па выніках фармавання ўчастковых выбарчых камісій Управа БНФ прыняла заяву, у якой асуджае недэмакратычнае і несумленнае фармаванне ўчастковых выбарчых камісіяў, масавыя адмовы ва ўключэнні ў камісіі прадстаўнікам Партыі БНФ і ГА БНФ «Адраджэньне», іншых дэмакратычных партыяў ды рухаў, прадстаўнікам беларускага народу, якія вылучаліся праз подпісы грамадзянаў. «Гвалт, хлусня і маніпуляцыі — вось падмурак цяперашняй улады. Яна зусім не ставіць задачу атрымаць на гэтых выбарах падтрымку народу. Наадварот, яны цудоўна ведаюць пра адсутнасць такой падтрымкі з боку беларусаў – і таму фармуюць камісіі такім чынам», – гаворыцца ў заяве Управы БНФ.

narodny.org

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: