Ціханоўская папрасіла эканамістаў дапамагчы з падрыхтоўкай праектаў рэформ

На эканамічным форуме ў польскім Карпачы Святлана Ціханоўская сустрэлася з беларускімі эканамістамі і аналітыкамі, паведамляе reform.by са спасылкай на офіс палітыка.
Фота: офіс Святланы Ціханоўскай

Фота: офіс Святланы Ціханоўскай


Сярод іх — Серж Наўродскі, Яўген Буры, Кацярына Барнукова, Дзмітрый Крук, Леў Львоўскі, Сяргей Чалы і палітолаг Рыгор Астапеня. Таксама на сустрэчы прысутнічаў прадстаўнік Ціханоўскай па эканамічных рэформах Алесь Аляхновіч.

Святлана Ціханоўская падзякавала ім за дапамогу і экспертызу ў падрыхтоўцы ўсёабдымнага плана эканамічнай дапамогі для дэмакратычнай Беларусі і папрасіла іх дапамагчы з падрыхтоўкай праектаў рэформ і інфраструктурных праектаў.

«Людзі хочуць ведаць, што іх чакае ў будучыні. І мы павінны быць гатовыя праводзіць рэформы, калі з'явіцца акно магчымасцей», — патлумачыла яна.

Удзельнікі сустрэчы абмеркавалі ўведзеныя санкцыі і неабходнасць падтрымкі пацярпелага ад рэжыму прыватнага бізнесу. У прыватнасці, ішла гаворка пра неабходнасць лібералізацыі экспарту паслуг з Беларусі ў ЕС.

Ціханоўская паабяцала абмеркаваць гэтыя прапановы з прадстаўнікамі Еўракамісіі ў бліжэйшы час. Паводле яе слоў, праца з бізнесам і падтрымка прыватнага сектара з'яўляецца адным з прыярытэтаў для эканамічнай каманды офіса.

Падчас сустрэчы таксама ішла размова пра ўмовы для беларускіх рэлакантаў за мяжой, візавыя пытанні, атрыманні дазволу на працу, магчымасці дыстанцыйна адкрываць банкаўскія рахункі і мець доступ да біржы працы.

Паведамляецца, што каманда Ціханоўскай працягне супрацоўніцтва з незалежнымі эканамічнымі экспертамі.

Нагадаем, што да каманды прадстаўніка Святланы Ціханоўскай па эканамічных рэформах Алеся Аляхновіча далучыліся новыя спецыялісты.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: