Ярмошына: Ціханоўскі небяспечны для дзяржавы і грамадства

Старшыня ЦВК Беларусі Лідзія Ярмошына 17 ліпеня ў жывым эфіры «Еўрарадыё» заявіла, што не забярэ са Следчага камітэта заяву, якую напісала на блогера Сяргея Ціханоўскага. 

Сяргей Ціханоўскі. Фота з архіву Еўрарадыё


"Гэты чалавек небяспечны і для дзяржавы, і для грамадства, — кажа Ярмошына. — І не па маёй заяве, але і па тых дзеяннях, якія ён прадпрымаў. Я думаю, грамадства гэта ўбачыць, калі будзе ісці суд".

Пра тое, што старшыня ЦВК падала заяву ў СК на Ціханоўскага, стала вядома ў сярэдзіне чэрвеня. У яго дзеяннях яна пабачыла пагрозу для сябе (падчас аднаго з стрымаў Сяргей Ціханоўскі анансаваў "прыход у госці" да Лідзіі Ярмошынай). Была распачата крымінальная справа, артыкул — "Перашкода ажыццяўленню выбарчых правоў..." (арт. 191 КК). Па ім блогеру пагражаюць грамадскія працы, або штраф, або папраўчыя працы — да двух гадоў, або абмежаванне волі на тэрмін да трох гадоў, альбо пазбаўленне волі на тыя ж тры гады.

Ціханоўскі знаходзіцца за кратамі з 29 траўня. Яго абвінавачаюць па некалькіх артыкулах КК. Сярод іх — "арганізацыя і падрыхтоўка групавых дзеянняў, якія груба парушаюць грамадскі парадак".

Ярмошына таксама заявіла, што група Ціханоўскага накіроўвала збор подпісаў на... змену ўлады.

euroradio.fm


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: