Чаму матэматыка заваліць перадвыбарнае абяцанне Лукашэнкі

Калі кіраўнік дзяржавы абураецца складанасцю праграм па матэматыцы, ён, мяркуючы па ўсім, мерае па сабе. У нашых уладаў наогул праблемы з гэтай навукай. Прынамсі, такія думкі ўзнікаюць, калі пачынаеш вырабляць элементарныя разлікі ў перадвыбарных абяцаннях Аляксандра Рыгоравіча.
Узяць хоць бы тыя самыя славутыя «па пяцьсот», якія беларусам абяцалі да 2010 года і толькі з цяжкасцю выцягнулі да 2019-га, парушыўшы ўсе законы матэматыкі і прадукцыйнасці. Але гаворка цяпер не пра заробкі.

Апроч іх, яшчэ адным упадабаным каньком, на якім кіраўнік Беларусі заязджае ў чарговы электаральны тэрмін, з’яўляюцца кватэры для шматдзетных.

Перадвыбарчая кампанія яшчэ не пачалася, а ўлады ўжо на ўсю моц пачалі раздаваць абяцанні для шматдзетных.

— Кіраўніцтва краіны паставіла задачу, каб у чарзе яны (шматдзетныя — заўв. рэд.) Стаялі не больш за год, — распавёў TUT.BY Аляксандр Аўраменка, начальнік упраўлення жыллёвай палітыкі Мінбудархітэктуры. — Таму бягучы і 2020 гады — напружаныя: мы павінны за два гады забяспечыць усіх, хто стаіць больш за год, жыллём. Калі не расхалоджвацца, ёсць магчымасці не толькі выканаць, але і перавыканаць гэты план.

Гэта значыць, разумееце, нават перавыканаць!

А цяпер сачыце за рукамі. У краіне, па дадзеных усё таго ж чыноўніка 34 838 шматдзетных сем’яў. Згодна з планамі на 2019 г. (ізноў жа ім агучаных), для шматдзетных сем’яў, якія стаяць на ўліку маючых патрэбу, улады абяцаюць пабудаваць 12 тысяч кватэр.

Увага пытанне: за колькі гадоў пры такіх тэмпах будаўніцтва атрымаюць кватэру ўсе гэтыя 34 838 шматдзетных сем’яў? У вас таксама не атрымалася рассяліць маючых патрэбу за два гады? (І гэта яшчэ не ўлічваючы тых, хто напэўна папоўніць гэты спіс за дадзены тэрмін). Ну як жа так? А перавыканаць план?!

Зрэшты, хіба нашы ўлады калісьці хвалявала, што адказ задачы не сыходзіцца з лічбамі? І сапраўды як толькі Лукашэнка не раздаваў гэтыя запаветныя метры шматдзетным. Перад выбарамі 2006-га, напрыклад, кіраўнік дзяржавы заявіў:

— У Беларусі настаў час прымаць рашэнне: трое дзяцей — бясплатная кватэра. Толькі такім чынам мы зможам вырашыць дэмаграфічную праблему.

Праз тры месяцы Лукашэнка перадумаў: сем’ям з трыма дзецьмі кватэру абяцаў ўжо за паўкошту.

А яшчэ праз пару тыдняў з’явілася перадвыбарная праграма кандыдата ў прэзідэнты Аляксандра Лукашэнкі, у якой гаварылася: «Наш арыенцір: кожнай маладой сям’і — кватэру не пазней чым праз 3 гады пасля ўступлення ў шлюб. А шматдзетным сем’ям дзяржава яе аплаціць: пры наяўнасці пецярых дзяцей — 100 працэнтаў, чатырох — 50 працэнтаў, трох — 30 адсоткаў».

Аб сваім абяцанні кіраўнік дзяржавы ўспомніў бліжэй да наступных выбараў.

— Калі нарадзіла траіх, ты атрымаеш жыллё за невялікую цану, а можа, і бясплатна ў залежнасці ад развіцця эканомікі. Калі ў сям’і чацвёра-пяцёра дзяцей, то гэта сапраўды бясплатная кватэра, — паабяцаў ён у 2010.

І так кожную перадвыбарчую кампанію.

Каб зразумець цану гэтых слоў, дастаткова ўспомніць гісторыю шматдзетнай маці 5-х дзяцей Людмілы Аўсянік са Смаргоні. Страціўшы мужа, жанчына восем гадоў безвынікова стаяла ў чарзе на паляпшэнне жыллёвых умоў, мучылася па інтэрнатах, якія былі ў аварыйным стане, брала крэдыты, каб хоць крыху прывесці сваё жыллё ў парадак. І ўсюды, дзе яна спрабавала атрымаць дапамогу ад дзяржавы, чула фразу: «Навошта вы столькі нараджалі!»

І гэта, бадай, усё, што трэба ведаць аб клопаце нашых уладаў і іх новых абяцаньняў у лічбах і дзеяннях.

Паводле Салідарнасці

Хочаце ведаць больш? Сачыце за нашымі публікацыямі ў Telegram і Facebook!