Эксперт: Каранавірус паказаў, як Расія насамрэч ставіцца да Беларусі

У панядзелак 16 сакавіка расійскі ўрад заявіў, што з-за распаўсюджвання каранавіруса закрывае мяжу з Беларуссю. Рэакцыя Аляксандра Лукашэнкі была практычна імгненнай.

«Усе песні пра Саюзную дзяржаву — абсалютны пшык»

«Хачу некаторым гарачым галовам у Расіі параіць думаць, перш чым казаць. Справа ў тым, што зачыніць, як і пачаць нейкую вайну, заўсёды прасцей, чым потым з гэтай сітуацыі выходзіць. Таму што пасля закрыцця прыйдзе перыяд, калі трэба будзе адкрываць... Навошта ж адрэзалі Беларусь ад Расіі, не падумаўшы пра наступствы?», — абурыўся кіраўнік Беларусі.

Ён таксама дадаў:

«Як можна прымаць такія рашэнні? Не параіўшыся, паставіць перад фактам. Гэта для мяне незразумела. І самае цікавае: калі ўжо зачыняць мяжу — гэта, напэўна, не ўрада справа. Гэта рашэнне павінен прымаць прэзідэнт краіны».

UDF.BY пацікавіўся ў палітолагаў, ці стала рашэнне Масквы палітычнай праблемай у адносінах дзвюх краін.

«Ніхто і ў грош не ставіць інтарэсы Беларусі»

Кіраўнік Цэнтра еўрапейскай трансфармацыі Андрэй Ягораў у каментары UDF.BY адзначыў, што палітычная праблема відавочная.

«Важнае рашэнне прымаецца без узгаднення з беларускім бокам. То бок, усе гэтыя песні пра Саюзную дзяржаву, сумеснае рэгуляванне, нейкую палітычную агульнасьць — абсалютны пшык. У гэтай сітуацыі, калі пагроза расцэньваецца як сур’ёзная, можна было б хоць бы дамовіцца аб калектыўных і аднолькавых мерах. Але не. Тое, што такое рашэнне аб мяжы прымаецца ў аднабаковым парадку, сведчыць аб стане палітычных адносін, у тым ліку ў межах Саюзнай дзяржавы», — лічыць Ягораў.

Чаму Міхаіл Мішусцін не стаў улічваць пазіцыю афіцыйнага Мінска?

«Гэтая сітуацыя паказвае рэальнае месца і ролю беларускага пытання ў сістэме прыняцця палітычных рашэнняў у Расіі, дзе інтарэсы Беларусі не ўлічваюцца. І паказвае сапраўднае стаўленне расійскага істэблішменту да Беларусі. І калі яны кажуць пра паглыбленую інтэграцыю, то трэба разумець, што роўна тое самае будзе, калі Мінск пагодзіцца з іх прапановамі. Ніхто і ў грош не ставіць інтарэсы Беларусі ў гэтым працэсе», — мяркуе Ягораў.

«Не думаю, што Пуцін не ведаў аб закрыцці мяжы»

Дырэктар інстытута «Палітычная сфера» і доктар палітычных навук Андрэй Казакевіч у каментары UDF.BY адзначыў, што Расія не ўпершыню спрабуе ўсталяваць кантроль над сумеснай мяжой.

«Але цяпер гутарка ўсё-ткі ідзе пакуль аб надзвычайных мерах і ў вырашэнні не прасочваецца прамая палітычная матывацыя. Хоць гэта і дадатковая падстава зразумець, наколькі ў нас адносіны з Расіяй выбудаваныя па прынцыпе ўзаемнага ўліку інтарэсаў. Такі крок, так ці інакш, павінен быў сур’ёзна абмяркоўвацца паміж бакамі. Тут пытанне не ў самой зробленай меры, а ў тым, наколькі сур’ёзна былі праведзены кансультацыі і перамовы», — сказаў Казакевіч.

Лукашэнка выказаў занепакоенасць, што могуць узнікнуць праблемы, калі мяжу трэба будзе адкрываць. Але палітолаг у гэтым сумняецца.

«Адсутнасць мяжы з Беларуссю — у інтарэсах Расіі, гэта дадатковая прывязка нашай краіны да РФ. Хоць раней Масква выказвала занепакоенасць бяспекай мяжы з улікам паслаблення візавага рэжыму з боку Беларусі для шматлікіх краін», — адзначыў Казакевіч.

Ці можа размова Лукашэнкі з Пуціным змяніць рашэнне Масквы аб закрыцці мяжы?

«Не думаю, што Пуцін не ведаў пра гэта. З боку Лукашэнкі гэта элемент палітычнай гульні. Усё ж такі вінаваціць у цэлым усю Расію для беларускіх уладаў азначала б скарачэнне магчымасцяў для манёўру. А калі громаадводам выступае толькі расійскі ўрад, то яшчэ застаецца незадзейнічаным механізм зносін з самім Пуціным», — лічыць Казакевіч.

Паводле udf.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: