Еўракамісія абвясціла аб падаражанні шэнгенскіх візаў

Улады ЕС пачалі падрыхтоўку рэформы сістэмы выдачы ўязных дакументаў, па выніках якой атрымаць візы стане прасцей, але памер збору вырасце да €80, паведамляе "Радыё Свабода".

Еўракамісія абвясціла аб распрацоўцы паправак у візавыя правілы, прызначаных спрасціць уезд у шэнгенскую прастору для тых, хто перасякае яго мяжы легальна, паведамляе Еўракамісія.

«Прапанаваная намі рэформа зробіць працэдуру атрымання віз для законапаслухмяных падарожнікаў лёгкай і хуткай, у той час як паляпшэнне стандартаў бяспекі дапаможа лепш выяўляць і спыняць тых, хто такімі не з’яўляюцца», — заявіў камісар па пытаннях міграцыі, унутраных спраў і грамадзянства Дзімітрыс Аўрамапулёс.

Апрача спрашчэння самой працэдуры, скараціцца і тэрмін выдачы візаў — да 10 дзён, а падаваць дакументы можна будзе яшчэ за паўгады да запланаванай паездкі. Таксама плануецца, што працэдуры афармлення заяўкі і яе падачы стануць цалкам электроннымі.

Яшчэ адной навінкай стане магчымасць для жыхароў асацыяваных з ЕС краін атрымліваць кароткатэрміновыя візы наўпрост на мяжы, але вельмі абмежавана і толькі ў некаторых выпадках. Да гэтага ж, уладальнікі такіх віз не здолеюць знаходзіцца ў іншых краінах ЕС.

У той жа час тыя, хто рэгулярна прыязджае ў ЕС, могуць разлічваць на паскоранае атрыманне доўгатэрміновых шматразовых віз з тэрмінам дзеяння ад 1 года да 5 гадоў.

Паколькі ўзмацненне стандартаў бяспекі прывядзе да росту выдаткаў, Еўракамісія плануе павялічыць памер консульскага збору. У цяперашні час стандартны памер збору складае € 60, па выніках рэформы яго плануюць павысіць да € 80.

«Гэты ўмераны рост закліканы дазволіць дзяржавам-чальцам падтрымліваць неабходную колькасць персаналу консульстваў для забеспячэння падвышанай эфектыўнасці праверак, а таксама забяспечыць мадэрнізацыю IT-абсталявання і праграмнага забеспячэння, не ствараючы перашкод для заявак на атрыманне візы», — гаворыцца ў паведамленні Еўракамісіі.

 

Хочаце ведаць больш? Сачыце за нашымі публікацыямі ў Telegram і Facebook!