Як работнікаў МАЗа ўгаворвалі падпісаць патрэбны пратакол на выбарах

У рэдакцыю TUT.BY даслалі аўдыё, на якім сябры ўчастковай выбарчай камісіі абмяркоўваюць, ці падпісваць выніковы пратакол галасавання на прэзідэнцкіх выбарах.
Фота: Вольга Шукайла, TUT.BY

Фота: Вольга Шукайла, TUT.BY



У камісіі засядалі работнікі прэсава-кузаўнога завода МАЗа, і многія былі абураныя, што ў дакуменце паказалі лічбы, якія моцна адрозніваюцца ад рэальных. "Як глядзець людзям у вочы? Як спаць пасля такога?" — абураюцца сябры камісіі. На гэта старшыня тлумачыць, што выправіць лічбы ім не дазволяць, і дадае: «Сорамна, што мы ўляпаліся ў такое з-за нашага бездапаможнага кіраўніцтва». У Цэнтрвыбаркаме TUT.BY пацвердзілі, што азнаёміліся з аўдыёзапісам, аднак заяў па гэтым факце не паступала і праверка не вядзецца.

Гаворка ідзе аб выбарчым участку № 70, які размяшчаўся ў Доме культуры МАЗа. Большасць членаў камісіі — работнікі прэсава-кузаўнага завода МАЗа, людзі вопытныя: да гэтага ўжо працавалі на выбарах. Узначальваў камісію галоўны тэхнолаг Уладзімір Усачоў, ён — галоўная дзеючая асоба запісу размовы, таксама можна чуць рэплікі старшыні прафсаюзнай ячэйкі завода Галіны Канаплянік. Адразу скажам, што Уладзімір Мікалаевіч адмовіўся пракаментаваць запіс, а Галіны Віктараўны на працоўным месцы няма, яна ў адпачынку, але сапраўднасць запісу TUT.BY пацвердзілі некалькі сябраў камісіі, якія таксама прысутнічалі пры размове.

Пачынаецца запіс са слоў: "А на вуліцы натоўп". Яшчэ да закрыцця выбарчых участкаў, а іх у ДК МАЗ размясцілася некалькі, выбаршчыкі сталі збірацца ля ўваходу, каб даведацца вынікі выбараў: па законе, камісія павінна вывесіць выніковы пратакол. Аднак неўзабаве прыбыў АМАП, людзей затрымлівалі, не дачакаўшыся
У гэты час на ўчастку № 70 старшыня пачаў угаворваць сябраў камісіі падпісаць пратакол з патрэбнымі лічбамі.

— Ну дык што, падпісваем? Міхалыч, ты што? — чуецца голас Усачова.

— Мікалаевіч, такія лічбы... Я не буду. Такія лічбы ... — адказваюць яму.

— Значыць, хто падпісвае, зразумела, хто не падпісвае — разважае старшыня камісіі. — Падпісваюцца па ўсім раёне. Я сказаў генеральнаму (дырэктару. — Прыма. TUT.BY), што камісія ў поўным складзе падтрымлівае.

— 10−20%? Мікалаевіч, можна падтрымаць, — кажа старшыня прафсаюза на заводзе Галіна Канаплянік.

— Віктараўна, — пярэчыць ёй Усачоў.

— Вы як хочаце, хай мяне выганяюць з працы, мне сумленне маё, унутранае сумленне, не дазволіць — - працягвае яна. — Я не магу, я не падпішу. Астатнія — як хочуць. У мяне проста свая сумленне. Я не магу. Падтасаваць можна, калі ледзь-ледзь, трошкі, я лічу. За Дзмітрыева — нуль, за Канапацкую — нуль, за Чарэчня, напэўна, два чалавекі ўсяго, за Лукашэнку ў мяне тры чалавекі ўсяго. Усе, астатнія ўсе — за Ціханаўскую. Я не магу, праўда, хоць павесьце мяне. Астатнія няхай як хочуць. Як мы будзем людзям у вочы глядзець? Вось мы выйдзем, і людзі будуць нас сустракаць. Як мы будзем у вочы ім глядзець?

— Ну то ёсць усе белыя і пухнатыя, як я разумею? — пытае старшыня.

— Што значыць «белыя і пушыстыя»? — удакладняе Канаплянік. — Трэба давесці рэальныя лічбы, хай ўсе ведаюць, як людзі прагаласавалі.

— Едзьце і даводзьце, Галіна Віктараўна, — кажа ёй іншы жаночы голас. — Едзьце ў выканкам і даводзьце.

— Так, сорамна будзе глядзець у вочы — разважае Усачоў. — Мне ўжо сорамна, і раней было сорамна.

— Раней не было, — пярэчаць яму ў адказ.

— Раней, я маю на ўвазе, пазаўчора, тры дні таму, было сорамна, учора было сорамна, сёння было сорамна, — удакладняе ён.

— Ну тут ужо настолькі відавочна, — кажа Галіна Віктараўна. — Трэба так і даводзіць. Патэлефануй у выканкам, скажы, як яно ёсць на самой справе.

— Віктараўна, ты што, здзекуешся? Што, думаеш, я не казаў? — кажа Уладзімір Усачоў.

— Цэлы дзень гаварылі, — паўтарае яму яшчэ адзін член камісіі.

— І Гранкоўскаму казаў, — верагодна, гаворка ідзе пра дэпутата Аляксандра Гранкоўскага, які да абрання ў парламент быў намеснікам гендырэктара МАЗа.

— Дык што, нас тут усіх за ідыётаў трымаюць? Дурні тут усе? — абураецца Галіна Віктараўна.

— Такія лічбы завышаныя, Мікалаевіч, — кажа старшыні яшчэ адзін член камісіі.

— Я дапускаю, нават 20% згодная, як заўсёды, — працягвае лідар прафсаюза.

— Віктараўна, не падпісваеш? — удакладняе ў яе Усачоў.

— Я не магу, — кажа яна.

Цалкам рашыфоўку запісу можна парчытаць па спасыдцы https://news.tut.by/society/704206.html



Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

  • Апошняе на сайце
,

Больш цікавага на «Новым Часе»: