Кампанія «Права выбару» заяўляе пра беспрэцэдэнтны ціск на незалежных назіральнікаў

Заява кампаніі назірання «Права выбару» з нагоды затрыманняў і арыштаў незалежных назіральнікаў з'явілася 9 жніўня, у нядзелю.
Размяшчаем для нашых чытачоў тэкст заявы:

«Прэзідэнцкая выбарчая кампанія-2020 праходзіць у жорсткіх і напружаных умовах: сотні жыхароў Беларусі, якія праяўляюць грамадска-палітычную актыўнасць, трапілі пад прэсінг уладаў, па надуманых падставах іх затрымліваюць і арыштоўваюць. Не сталі выключэннем у такой сітуацыі і незалежныя назіральнікі.

Замест адкрытага і галоснага, сумленнага і праўдзівага падліку галасоў за ўсіх кандыдатаў Цэнтрвыбаркам прыняў працэдуру, якая дазваляе маніпуліраваць волевыяўленнем народу Беларусі. Улады перайшлі да тактыкі адкрытага змагання з незалежнымі назіральнікамі, людзьмі, якія маюць адну мэту: фіксацыя яўкі і кантроль за працэдурай галасавання.

Вынікам гэтага сталі шматлікія затрыманні, суды, арышты над незалежнымі назіральнікамі.
Кампанія «Права выбару» заяўляе пра беспрэцэндэнтны ціск на іх і патрабуе ад уладаў:

- забяспечыць грамадзянам Беларусі магчымасць назіраць за працэсам у асноўны дзень галасавання.

- адмовіцца ад практыкі адвольнага пакарання незалежных назіральнікаў па скаргах прадстаўнікоў выбаркамаў ці іншых назіральнікаў

- забяспечыць празрысты і дэмакратычны падлік галасоў і зняць абмежаванні на доступ да яго.

Мы лічым, што ў такіх складаных умовах назіральнікі, якія кожны дзень прыходзяць да сваіх участкаў, каб зафіксаваць умовы, у якіх праходзяць выбары, сапраўдныя героі гэтай выбарчай кампаніі.

Мы заклікаем грамадзян Беларусі да салідарнасці. Далучайцеся да назірання, дапамагайце назіральнікам у выпадку патрэбы. У нас усіх адна мэта – свабодныя выбары і дэмакратычная Беларусь».

Паводле прэс-рэліза

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: