Каму выгадны суд над галоўным рэдактарам TUT.by Марынай Золатавай?

Чаму справа дайшла да суду — пра гэта намеснік старшыні Беларускай асацыяцыі журналістаў юрыст Алег Агееў.
12 лютага суд Заводскага раёна Мінска пачне разгляд крымінальнай справы ў дачыненні да галоўнага рэдактара партала TUT.BY Марыны Золатавай.

Марына засталася адзінай абвінавачванай па «справе БЕЛТА», астатнія 14 фігурантаў-супрацоўнікаў розных СМІ вызваленыя ад крымінальнай адказнасці з прыцягненнем да адміністрацыйнай. Галоўрэда TUT.BY абвінавачваюць па частцы 2 артыкула 425 Крымінальнага кодэкса (Бяздзейнасць службовай асобы), санкцыя артыкулу — ад штрафу і да 5 гадоў пазбаўлення волі.

— Чаму справа Марыны Золатавай ўсё ж такі дайшла да суда ў адрозненне ад іншых фігурантаў, якія праходзілі па «справе БЕЛТА»?

— Золатава адбывалася не па тым артыкуле, які быў у іншых фігурантаў. У іх быў несанкцыянаваны доступ да інфармацыі, а ў Марыны Золатавай — службовае злачынства.

— Каму выгадны суд над Золатавай?

— Падобна на тое, наша дзяржава сур’ёзна занепакоена невысокім узроўнем уплыву на медыя-рынку Беларусі дзяржаўных медыя. Іх канкурэнтаў спрабуюць нейтралізаваць. Але гэта толькі маё меркаванне, якое ўзнікае не з матэрыялаў справы, а з таго, што адбываецца са свабодай слова ў Беларусі ў апошнія гады.

— Навошта ўладам наогул гэты суд над галоўным рэдактарам найбуйнейшага недзяржаўнага партала ў той час, калі афіцыйны Менск спрабуе наладзіць адносіны з Захадам?

— Калі гэтыя працэсы і ўзаемазвязаны, то трэба ўлічваць, што адны людзі ў дзяржаўных органах спрабуюць наладзіць гэтыя адносіны, а іншыя робяць сваю працу так, як яны яе разумеюць. І гэта не адзін і той жа чалавек. Падазраю, што гэта рознанакіраваныя дзеянні, якія не каардынуюцца.

— Наколькі сур’ёзнае высунутае супраць Марыны Золатавай абвінавачванне?

Думаю, пазбаўленне волі ў выглядзе пакарання прызначанае быць не можа, тым не менш, па гэтым артыкуле ёсць магчымасць прызначыць пакаранне ў выглядзе абмежавання права займаць пэўныя пасады. Улічваючы цяперашнюю пасаду, гэта можа быць сур’ёзным ударам па Марыне Золатавай і па TUT.BY у цэлым.

— Ці могуць Золатавай наогул забараніць займацца журналісцкай дзейнасцю?

— У прафесійным плане ёй могуць забараніць займаць кіруючыя пасады. Проста журналіст — не кіруючая пасада, а галоўны рэдактар ​​— кіруючая.

— Якую рэакцыю можа выклікаць гэты крымінальны працэс у міжнароднай супольнасці і ўнутры Беларусі?

— За гэтым працэсам сапраўды будуць назіраць вельмі шмат арганізацый і людзей. Іх рэакцыя будзе залежаць выключна ад зыходу гэтага судовага працэсу.

— Ці ёсць хоць якая магчымасьць, што Марыну Золатава суд апраўдае?

— Тэарэтычна такая магчымасць ёсць заўсёды. Але калі паглядзець на працэнт апраўдальных прысудаў, якія выносіць судовая сістэма Беларусі, то гэтая верагоднасць невысокая.

Я думаю, што міжнароднай супольнасці і грамадзянскай супольнасці Беларусі, усім медыя-гульцам трэба ўважліва сачыць за гэтым працэсам. А самой Марыне хочацца пажадаць не баяцца і думаць пра тое, што шмат людзей яе падтрымліваюць, і ў прынцыпе гатовыя аказаць любую дапамогу пры любым выніку.

Паводле Заўтра тваёй краіны

Хочаце ведаць больш? Сачыце за нашымі публікацыямі ў Telegram і Facebook!