Кандыдату ў дэпутаты Віктару Карыбут-Дашкевічу ў аўтабіяграфіі прапанавалі замест «ліцьвіна» і «каталіка» пазначыць «не судзімы»

У кандыдата ад Партыі БНФ па Пастаўскай выбарчай акрузе №29 Віктара Карыбут-Дашкевіча прыбралі з анкеты пункты нацыянальнасці і рэлігійнай прыналежнасці.


 Акрамя гэтага з маёй біяграфіі таксама прыбралі і тое, што я выдаў зборнік вершаў Янкі Купалы. Мне сказалі, што гэта не біяграфічныя звесткі. Але ж гэта маё дасягненне, якое мне не было дазволена пазначыць, — падкрэсліў кандыдат у дэпутаты.

Віктар Карыбут-Дашкевіч лічыць, што гэта важныя дадзеныя, якія ён хацеў падкрэсліць і зрабіць адкрытымі для выбаршчыкаў.

 Мне сказалі, што пазначанае мной адрозніваецца ад стандартных біяграфічных звестак. А я прапанаваў, каб іншыя кандыдаты напісалі, што яны беларусы, палякі, ці рускія, — дадаў Віктар.

Тым больш, што ў аўтабіяграфічных дадзеных была графа «нацыянальнасць», якую можна было адзначаць па-жаданні, што і зрабіў вылучэнец ад Партыі БНФ.

Кандыдату ў дэпутаты патэлефанавалі з акруговай выбарчай камісіі і сказалі, што гэтак аўтабіяграфіі не пішуцца, і ўсё павінна быць «аднолькава па стандарце і без адрозненняў».

 Мне сказалі: «Ну што, вы згодныя з такім варыянтам?» А куды мне было дзявацца? Жанчына выцягнула ў мяне гэтае «Згодны». Калі б я сказаў катэгарычнае не, то напэўна, і не апублікавалі бы мае звесткі ўвогуле, — працягвае Віктар Карыбут-Дашкевіч.

Кандыдату таксама прапанавалі, каб ён напісаў у аўтабіяграфіі «не судзімы», але гэта рабіць ён адмовіўся.


Паводле прэс-службы кампаніі назірання «Права выбару-2016»

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: