МЗС Эстоніі і Нарвегіі заклікалі беларускія ўлады правесці новыя выбары

Эстонія да таго ж плануе падняць беларускае пытанне ў Радзе Бяспекі ААН, паведамляе Свабода.
Міністарка замежных спраў Нарвегіі Інэ Эрыксэн Сёрэйдэ заклікала беларускія ўлады выканаць рэкамендацыі дакладу АБСЕ, піша БелаПАН.

«Мы асуджаем парушэнні правоў чалавека, задакументаваныя ў дакладзе Маскоўскага механізму, і заклікаем улады Беларусі выконваць рэкамендацыі гэтага дакладу. Яны павінны аб’явіць новыя выбары, спыніць гвалт, катаванні і арышты мірных дэманстрантаў, забяспечыць свабоду прэсы і пакараць вінаватых у злоўжываннях», заявіла Сёрэйдэ.

Эстонія плануе вынесці беларускае пытанне на абмеркаванне ў Радзе Бяспекі ААН. Пра гэта міністр замежных спраў Эстоніі Урмас Рэйнсалу паведаміў «Голасу Амерыкі».

Ён таксама адзначыў, што арганізацыя новых выбараў — адзінае выйсце з крызісу ў Беларусі.

«Першы крок, які павінны зрабіць улады Беларусі — гэта спыніць гвалт.

Па-другое, вызваліць усіх палітычных зняволеных і прыцягнуць да адказнасці тых, хто прымяняў гвалт.

Таксама вельмі важна пачаць палітычны дыялог.

Адзіным выхадам з крызісу ёсць правядзенне свабодных і справядлівых выбараў», — сказаў Урмас Рэйнсалу.

Ён таксама не выключае, што краінам Захаду давядзецца ўвесці дадатковыя эканамічныя санкцыі супраць рэжыму Лукашэнкі.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: