Пікет #вучобаважнейшая ў Мінску: адзін удзельнік і шэсць міліцыянтаў (ФОТА)

Сёння, 24 жніўня, на плошчы Бангалор адбылася другая акцыя супраць скандальнага закону. У ёй удзельнічаў адзін чалавек.


Удзельніка сённяшняга адзіночнага пікету завуць Кірыл. Ён растлумачыў НЧ прычыны свайго выхаду на мерапрыемства:

— Мне самому 27 год, я не падыходжу пад закон, але ў мяне ёсць сябры, разумныя хлопцы, якіх гэта датычыцца, і якія планавалі ісці ў магістратуру, але зараз гэта ўсё пад пытаннем. Я лічу, што гэты закон не дае магчымасці ім працягваць іх дзейнасць, і гэта не тыя людзі якія павінныя ісці ў армію. У мяне няма негатыўнага стаўлення да арміі, хіба толькі пытанні да яе эфектыўнасці і патрыятычнасці. Я думаю, што гэты закон руйнуе навуковыя кар'еры і кар'еры людзей.

— І ты думаеш, у вас ёсць шанец?
— Я думаю, што сваімі мітынгамі і пікетамі мы можам дамагчыся адмены закону. Улада зараз не такая моцная, каб жорстка стаяць на сваім. Калі мы будзем усе разам, то мы можам перамагчы.

— То-бок, ты гэта бачыш як частку больш шырокай кампаніі?
— Так.

— Вы за адмену гэтага закону?
— Так, трэба адмяняць цалкам.

— Што ты прапануеш у якасці рашэння праблемы, якую агучвае ўлада: "няма каму ісці ў армію"?
— Трэба не колькасць павышаць, а якасць. Мы чуем пра самагубствы і пра тое, што людзі страляюцца два разы на паўгады. Усё гэта трэба змяняць.





За ўдзельнікам акцыі, які сядзеў за сталом (дарэчы, надпіс на ім — адаптацыя вядомага мема), сачылі шасцёра міліцыянтаў.

Нагадаем, праект закону ўпершыню быў апублікаваны 25 чэрвеня. Петыцыя за ягонае скасаванне сабрала рэкордную колькасць подпісаў за адзін дзень.

Хочаце ведаць больш? Сачыце за нашымі публікацыямі ў Telegram і Facebook!