Самыя злосныя парушальнікі рэжыму

Вязень сумлення Андрэй Бандарэнка, які цяпер e адзіночнай камеры Магілёўскай турмы №4, з болем у сэрцы ўспрыняў інфармацыю пра тое, што Міхаіла Жамчужнага паставілі на прафілактычны ўлік як злоснага парушальніка рэжыму.

Фармальнай падставай паслужыла «адзіночнае стаянне» каля медчасткі калоніі.

Андрэй Бандарэнка піша пра свае спробы абскардзіць рашэнне пра пастаўку на такі ўлік. Першапачаткова ён падаў скаргу па месцы свайго знаходжання — у суд Ленінскага раёна Магілёва. Аднак там адказалі — не да падсуднасці, звяртайцеся ў суд па месцы накладання спагнання (папраўчая калонія №19 Шклова). Бандарэнка звярнуўся са скаргай у суд Шклоўскага раёна. А там адмовілі, матывуючы тым, што пастаноўка на прафілактычны ўлік як злоснага парушальніка рэжыму — гэта не спагнанне, а стан зняволенага. Атрымліваецца, што наданне гэтага «звання» — таўро на вязні да канца тэрміну. Яго нельга зняць, а ў судзе — абскарджваць.

І яшчэ адна «крыўда». Бандарэнка папрасіў адміністрацыю турмы даць спатканне з бацькам на два месяцы раней: не ў лютым 2017 года, як гэта запланавана, а ў снежні 2016-га, паколькі 31 сакавіка 2017 года праваабаронцу павінны выпусціць з турмы. Але адмовілі. Больш за тое, калі яму паведамілі аб адмове, ён спытаў: «Дык, можа быць, адмовіце і ў дазволеным спатканні?». У гэтым яго пераконваць не сталі. Цяпер ён задумаўся, што можа стаць падставай для новага спагнання. Адна з яго здагадак — «не ўтрымліваў у чысціні жылое памяшканне». А калі пылу не знойдуць, то, на яго думку, могуць выявіць і часцінкі радыяцыі.

З досведу «бывалых», самы цяжкі перыяд у зняволенні — апошнія месяцы. У сувязі з гэтым я прашу праз публікацыю ў газеце: «Госпадзе, дапамажы Андрэю Бандарэнку адбыць астатні тэрмін турэмнага зняволення і выйсці на свабоду! Адчапіцеся ад яго, ліхадзеі, не чыніце яму падкопы, бо будзеце пакараныя судом Божым і людскім!»

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: