Сейм Польшчы прыняў пастанову па справе Беларусі

Польскія дэпутаты, між іншым, патрабуюць згоды ўрада на хуткі прыём палітычных уцекачоў з Беларусі.
Сейм Польшчы прыняў пастанову па справе Беларусі. PAP/Radek Pietruszka

Сейм Польшчы прыняў пастанову па справе Беларусі. PAP/Radek Pietruszka



Аднадушна без галасавання Сейм Польшчы прыняў пастанову, у якой асуджае дзеянні беларускіх уладаў і выказвае салідарнасць з беларускім грамадствам.

«Мы настойліва патрабуем ад уладаў Мінска неадкладна вызваліць усіх затрыманых, спыніць рэпрэсіі і гвалт супраць грамадства», — гаворыцца ў тэксце пастановы, які зачытала спікер Сейма Эльжбета Вітэк (Elżbieta Witek).

Сейм Польшчы рашуча асуджае ўжыванне ўладай Аляксандра Лукашэнкі жорсткага гвалту і масавых рэпрэсіі ў дачыненні да беларускага грамадства, а таксама фальсіфікацыю вынікаў прэзідэнцкіх выбараў, праведзеных у Рэспубліцы Беларусь 9 жніўня 2020 года. У выніку буйнамаштабнай хвалі гвалту, накіраванай супраць грамадзянаў Беларусі, загінулі дзве асобы, некалькі соцень атрымалі раненні, а больш за 7 тысяч былі арыштаваныя або затрыманыя.

Сейм асудзіў пазбаўленне грамадзян Беларусі права на ўдзел у свабодных, дэмакратычных выбарах і права на свабоду выказваць свае погляды. Дэпутаты таксама заклікалі беларускія ўлады распачаць мірны дыялог з грамадствам.

Сейм патрабуе згоды польскага ўрада на хуткі прыём палітычных уцекачоў з Беларусі і заклікае ўстановаў Еўрапейскага саюза прыняць рашучыя меры па падтрымцы беларускай грамадзянскай супольнасці.

www.polskieradio.pl

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

  • Апошняе на сайце
,

Больш цікавага на «Новым Часе»: