У Бундэстагу пракаментавалі Еўрагульні і правы чалавека ў Беларусі

У заяве, апублікаванай на сайце Бундэстага, адзначаецца, што камітэт па правах чалавека парламента ФРГ лічыць правядзенне ў Мінску Еўрапейскіх гульняў нагодай «акцэнтаваць увагу на вельмі крытычным становішчы з правамі чалавека і працягу прымянення смяротнага пакарання ў Беларусі», а таксама «настойваць на адчувальна і хуткім паляпшэнні» у гэтай сферы.


У заяве, апублікаванай на сайце Бундэстага, адзначаецца, што камітэт па правах чалавека парламента ФРГ лічыць правядзенне ў Мінску Еўрапейскіх гульняў нагодай «акцэнтаваць увагу на вельмі крытычным становішчы з правамі чалавека і працягу прымянення смяротнага пакарання ў Беларусі», а таксама «настойваць на адчувальна і хуткім паляпшэнні» у гэтай сферы.

«Беларусь — адзіная краіна на еўрапейскім кантыненце, якая па-ранейшаму выносіць і прыводзіць у выкананне смяротныя прысуды. Першыя пазітыўныя крокі да ўвядзення мараторыя на выкананне гэтага віду пакарання на мінулым тыдні былі сарваныя выкананнем смяротнага прысуду», — цытуе заяву БелаПАН.

Камітэт нагадвае, што прапановы БДІПЧ АБСЕ аб змене выбарчага заканадаўства, уключаючы празрысты падлік галасоў і ўключэнне прадстаўнікоў апазіцыі ў склад выбарчых камісій, не былі рэалізаваныя беларускімі ўладамі.

«Замест гэтага падчас мясцовых выбараў 18 лютага 2018 года зноў былі выяўлены парушэнні. У цяперашнім і наступным годзе чакаюцца парламенцкія і прэзідэнцкія выбары. У напярэдадні іх можна было б зноў паспрабаваць ажыццявіць прапановы БДІПЧ АБСЕ», — лічаць у Бундэстагу.

Урад Германіі, Савет Еўропы і Еўрапарламент «рэгулярна нагадваюць пра неабходнасць захавання правоў чалавека — але да гэтага часу без дастатковага поспеху». «Тым не менш, намаганні павінны працягвацца, напрыклад, у межах дыялогу аб правах чалавека паміж ЕС і Беларуссю (...) і ў межах паездкі прадстаўніка федэральнага ўрада на Еўрапейскія гульні ў Мінск», — прапануюць парламентарыі ФРГ.

Дэпутаты раскрытыкавалі абмежаванне свабоды СМІ, сходаў і аб’яднанняў у Беларусі. Апазіцыі «пастаянна ствараюць перашкоды ў яе палітычнай працы». Дзяржаўныя рэпрэсіі накіраваны на «праваабаронцаў, апазіцыйных палітыкаў, журналістаў і блогераў, адвакатаў і прафсаюзных дзеячаў». Дзейнасць незалежных няўрадавых арганізацый «па-ранейшаму моцна абмежаваная».

«Унутрыпалітычны працэс рэформаў стагнуе, умовы ўтрымання пад вартай вельмі дрэнныя, і нават малалетнія атрымліваюць драконаўскія тэрміны зняволення за злачынствы, звязаныя з наркотыкамі», — адзначаецца ў заяве.


«Нягледзячы на асобныя прыкметы адкрытасці, якія суправаджаюцца збліжэннем з Еўрапейскім саюзам, што прыкметны з моманту вызвалення палітвязняў у 2015 годзе, сітуацыя з правамі чалавека па-ранейшаму выклікае трывогу. Неабходны пераканаўчы і надзейны курс на станаўленне прававой дзяржавы і захаванне правоў чалавека, а таксама адмену смяротнага пакарання», — падкрэслівае камітэт.

Акрамя таго, лічаць нямецкія парламентарыі, Еўрапейскія алімпійскія камітэты пры вызначэнні патрабаванняў да арганізатараў буйных спартыўных спаборніцтваў павінны больш ўлічваць сітуацыю з правамі чалавека ў краінах-кандыдатах.

Заяву камітэта бундэстага ўхвалілі фракцыі ХДС/ХСС, СДПГ (сацыял-дэмакраты), СвДП (свабодныя дэмакраты) і Саюз-90/«Зялёныя». Левыя устрымаліся, а ўльтраправая «Альтэрнатыва для Германіі» прагаласавала супраць. Гэтыя фракцыі заявілі, што не ўдзельнічалі ў падрыхтоўцы дакумента.

У жніўні 2018 года прэзідэнт Нямецкага алімпійскага саюза Альфонс Хёрман не выключыў байкоту II Еўрапейскіх гульняў у Мінску з-за пераследу журналістаў. У інтэрв’ю Нямецкаму радыё ён заявіў тады, што саюз ад самага пачатку быў супраць перадачы беларускай сталіцы права праводзіць гэтыя спаборніцтвы. Пагроза байкоту гульняў не была рэалізаваная.



Хочаце ведаць больш? Сачыце за нашымі публікацыямі ў Telegram і Facebook!