У Оршы затрымалі Паўла Севярынца і незалежных журналістаў.

Пасля акцыі супраць «дэкрэту пра дармаедаў» у Оршы затрыманы сустаршыня БХД Павал Севярынец і кіроўца аўто, які яго вез, а таксама журналістка Радыё Свабода Галіна Абакунчык, фатограф БелаПАН Андрэй Шаўлюга і блогерка Анастасія Пілюгіна, журналісты Белсату Аляксандр Баразенка і Кацярына Андрэева.

Усе затрыманыя журналісты знаходзяцца ў аршанскім РУУС. Сувязь з імі адсутнічае, паведамляе svaboda.org.

Уласна акцыя прайшла без затрыманняў і сутычак. Каля 700 чалавек сабраліся на цэнтральнай плошчы, вырашылі скласці рэзалюцыю і занесці яе ў райвыканкам. Да ўдзельнікаў акцыі выйшаў прадстаўнік гарадской адміністрацыі, заявіў, што акцыя незаконная.

Севярынец заклікаў аршанцаў далучацца да акцыяў 15 і 25 сакавіка ў Мінску: «Вырашацца ўсё будзе ў сталіцы. 15 і 25 сакавіка мы павінны праявіць салідарнасць».

Па апошняй інфармацыі, яго машыну спынілі на вуліцы Першамайскай каля школы № 3, каб праверыць дакументы, паведамляе bchd.info.

Па інфармацыі Белсату, прадстаўнікі здымачнай групы якога знаходзіліся ў машыне разам з палітыкам, АМАП затрымаў Паўла Севярынца. Пры гэтым у машыне АМАПу знаходзіліся расейскія сцяжкі.

Белсат паведамляе, што аператара Аляксандра Баразенку затрымалі, з Кацярынай Андрэевай «размаўляюць» у Аршанскім РАУС. Праваахоўнікі вырашылі затрымаць Баразенку пасля таго, як ён паказаў расейскі сцяг, які вісеў за шыбай машыны АМАПу.

Яго даставілі ў Аршанскі РАУС, журналістка Кацярына Андрэева суправаджала яго ў машыне ДАІ.

Інфармацыю пра затрыманне пацвердзіў адказны сакратар БХД Дзяніс Садоўскі. “Хваля рэпрэсій працягваецца супраць БХД і іншых дэмакратычных арганізацый, якія ўдзельнічаюць у пратэстах. Але відавочна, што зараз гэта не пратэст апазіцыі, але пратэст беларускага народу. І калі сапраўды некалькі чалавек можна затрымаць, то супраць беларускага народу зрабіць нічога не атрымаецца. Акцыі пратэсту працягваюцца. І наступныя акцыі пройдуць у Менску і рэгіёнах 15 сакавіка. І мы павінны паказаць, што нас не запужаць. І мы прымусім сябе паважаць”, - адзначыў ён.

Між тым Павел Севярынец датэлефанаваўся да сваёй маці Таццяны Яўгенаўны і паведаміў, што ўжо знаходзіцца у аршанскім РАУСе. Паводле яго, разам з ім знаходзяцца журналісты, а таксама адзін мясцовы жыхар, які сам ускочыў у міліцэйскую машыну, “каб быць з Паўлам” – агулам 5 чалавек.

БелаПАН паведамляе, што журналісты, затрыманыя ў Оршы раней, адпушчаныя.

Карэспандэнт БелаПАН Адар'я Гуштын і фотакарэспандэнт "Нашай нівы" Сяргей Гудзілін былі затрыманыя на аршанскім чыгуначным вакзале каля 11.00 для праверкі асобы і дастаўленыя ў мясцовы апорны пункт міліцыі. Крыху пазней там жа былі затрыманы карэспандэнт tut.by Таццяна Мацвеева і фотакарэспандэнт сайта "Народныя навіны Віцебска" Сяргей Серабро — іх даставілі ў залу павышанай камфортнасці аршанскага вакзала.

Як паведаміла БелаПАН Мацвеева, яе і Серабро пратрымалі каля паўтары гадзіны і адпусцілі за 10 хвілін да пачатку акцыі супраць дэкрэта № 3, абвешчанай на 13.00. Яны паспелі патрапіць на мітынг.

Гуштын і Гудзіліна адпусцілі каля 14.00 — да таго часу акцыя ўжо завяршылася. Карэспандэнт БелаПАН напісала скаргу на дзеянні супрацоўнікаў міліцыі, якія перашкодзілі ёй выканаць свае прафесійныя абавязкі.

Варта адзначыць, што ва ўсіх затрыманых журналістаў былі рэдакцыйныя пасведчанні.



Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: