Украіна хоча правесці Алімпіяду разам з Беларуссю

Украіна разглядае магчымасць правядзення летніх Алімпійскіх гульняў разам з Беларуссю.
Такая інфармацыя была агучана 11 лютага прэм'ер-міністрам Украіны Аляксеем Ганчаруком на пасяджэнні арганізацыйнага камітэта па падрыхтоўцы і ўдзелу ўкраінскіх спартсменаў у Алімпіядзе-2020 у Токіо.

Пра гэта паведамляе прэс-служба ўкраінскага ўрада.

Па словах Ганчарука, ідэя прэзідэнта Украіны Уладзіміра Зяленскага аб правядзенні летняй Алімпіяды ва Украіне і Беларусі заслугоўвае увагі і будзе разгледжаная.

— Гэта важны і адказны іміджавы крок, — заявіў кіраўнік украінскага ўрада.

Ён адзначыў, такія маштабныя праекты спрыяюць інфраструктурнаму абнаўленню дзяржавы, дазваляюць павысіць турыстычную прывабнасць і нацыянальны прэстыж краіны.

Прэм'ер даручыў вывучыць вопыт Беларусі па правядзенні ІІ Еўрапейскіх гульняў 2019 года, вопыт еўрапейскіх краін у правядзенні Алімпіяд і распрацаваць план у адпаведнасці з конкурснымі патрабаваннямі Міжнароднага алімпійскага камітэта.

Нагадаем, яшчэ летам мінулага года Зяленскі даручыў пачаць падрыхтоўку да падачы заяўкі на правядзенне летніх Алімпійскіх гульняў.

Лукашэнка таксама раней выказваўся наконт сумеснага правядзення Алімпіяды: у верасні 2019 года ён прапанаваў правесці летнюю Алімпіяду разам з Украінай альбо Расеяй.

Паводле слоў Лукашэнкі, ва Украіне маецца шэраг аб'ектаў футбольнай інфраструктуры, якіх не хапае Беларусі.


Паводле belnovosti.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: