«Украіна не супраць свабоды сходаў». Амбасадар пракаментаваў мітынг у дыпмісіі

Мітынг ля амбасады Украіны ў Беларусі, хутчэй за ўсё, быў спланаванай акцыяй, але Украіна як дэмакратычная краіна не супраць свабоды сходаў, калі яны не ўяўляюць пагрозы для супрацоўнікаў дыпламатычнай установы і іх уласнасці. Пра гэта ў каментары «Укрінформ» заявіў пасол Украіны ў Беларусі Ігар Кізім.
Ігар Кізімі, фота Арцёма Лявы

Ігар Кізімі, фота Арцёма Лявы

Дыпламат распавёў, што сёння каля пяцідзесяці чалавек з беларускімі дзяржаўнымі сцягамі і плакатамі з абвінавачаннямі ў адрас Украіны падышлі да амбасады, скандуючы лозунгі накшталт «Фашызм не пройдзе!».

— Я выйшаў да названых асоб, каб высветліць прычыны мітынгу, і каля паўгадзіны тлумачыў нашу пазіцыю, распавядаў пра стаўленне Украіны да падзей у Беларусі, дружалюбным стаўленні Украіны да беларускага народа, а таксама пра далейшую расійскую агрэсію супраць нашай дзяржавы. Пераканаць гэтых людзей было цяжка, але я думаю, што мець зносіны трэба, і спадзяюся, што хоць некаторыя з іх змянілі сваё меркаванне, — адзначыў пасол.

Ён таксама падкрэсліў, што мітынг здымаў адзін з тэлеканалаў дзяржаўнага тэлебачання, карэспандэнт якога «нечакана» апынуўся разам з мітынгоўцамі перад пасольствам. Акрамя таго, удзельнікі мітынгу пасля завяршэння мерапрыемства арганізаванай калонай накіраваліся да дома, дзе знаходзіцца гарадскі камітэт БРСМ.

Паводле слоў Кізіма, гэтыя факты даюць падставы казаць, што мітынг быў не спантаннай, а спланаванай акцыяй. Ён таксама звярнуў увагу на тое, што па заканадаўстве Беларусі на правядзенне мітынгаў трэба атрымліваць дазвол мясцовых улад.

— Праваахоўныя органы не інфармавалі нас аб яго правядзенні, як гэта робіцца звычайна, і не перашкаджалі яго правядзенню. Калі мітынг сапраўды адбыўся пры падтрымцы мясцовых улад, мне не зразумела, навошта гэта было зроблена. Але відавочна, што такія крокі не спрыяюць паляпшэнню ўзаемаразумення паміж нашымі краінамі. У той жа час адзначу, што мітынг быў мірным, і Украіна як дэмакратычная краіна не мае пярэчанняў адносна падобных сходаў, калі яны не нясуць пагрозы жыццю, здароўю і ўласнасці супрацоўнікаў дыпламатычнай установы, — сказаў Кізім.

Дыпламат нагадаў, што пасля леташніх прэзідэнцкіх выбараў у Беларусі, вынікі якіх Украіна не прызнала, палітычныя адносіны паміж краінамі пастаўлены на паўзу. Але, каб не нашкодзіць людзям, украінскі бок спрабуе падтрымліваць пэўны ўзровень гандлёва-эканамічных і культурна-гуманітарных сувязей.

— Хачу яшчэ раз падкрэсліць: Украіна не ўмешвалася і не ўмешваецца ва ўнутраныя справы Беларусі. Сітуацыю ў Беларусі павінен вырашаць выключна беларускі народ, гэтак жа, як і праблемы ва Украіне —украінцы. Украіна — за добрасуседскія адносіны з Беларуссю, — рэзюмаваў пасол.

Сёння ў Мінску людзі з дзяржаўнымі сцягамі зладзілі пікеты каля пасольстваў ЗША і Украіны. Пасол Украіны Ігар Кізім выйшаў да пратэстоўцаў, але дыялогу не атрымалася. Таксама ўвечары ў эфіры дзяржаўных тэлеканалаў паказалі і пікет каля консульства Украіны ў Брэсце.

Паводле news.tut.by

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: