БХД будзе заклікаць, каб дэлегацыю ўладаў не пускалі ў ПАРЕ

9 жніўня ў Мінску адбудзецца сустрэча лідараў беларускай апазіцыі з місіяй Парламенцкай асамблеі Рады Еўропы на чале з аўстрыйскім дэпутатам Гізелай Вурст.


У сустрэчы возьмуць сярод іншых удзел сустаршыня Беларускай хрысціянскай дэмакратыі Віталь Рымашэўскі і іншыя прадстаўнікі Правацэнтрысцкай кааліцыі.

“Маім асноўным месіджам на сустрэчы будзе тое, што ў Беларусі і блізка няма свабодных і справядлівых выбараў. Апроч таго, з’яўляюцца новыя палітвязні, падчас парламенцкай кампаніі адбываецца ціск на грамадскіх актывістаў, а самага вядомага беларускага музыку Лявона Вольскага пазбавілі права выступаць у Беларусі і фактычна з-за яго канцэрта не зарэгістравалі кандыдатам Алеся Лагвінца. Тое, што адбываецца ў краіне, нельга назваць інакш, як прававое бязмежжа”, — адзначыў сустаршыня БХД.

Паводле яго, уся выбарчая кампанія — блага пастаўлены спектакль, у якім няма ніякіх шанцаў для незалежных кандыдатаў прайсці праз сістэму фальсіфікацый і быць абранымі ў парламент.

Апроч таго, Віталь Рымашэўскі плануе нагадаць прадстаўнікам ПАРЕ, што беларускім хрысціянскім дэмакратам шэсць разоў адмаўлялі ў рэгістрацыі ў якасці палітычнай партыі, каля 15-і разоў — як грамадскаму аб’яднанню. “Хрысціянскіх дэмакратаў пазбавілі права на ўдзел у выбарчых кампаніі”, — сказаў ён.

“Беларускія ўлады імкнуцца, каб іх дэлегацыя была на роўных прадстаўленая ў ПАРЕ. Беларуская хрысціянская дэмакратыя і я персанальна — мы будзем заклікаць, каб гэтага яны не атрымалі, бо ў Беларусі няма свабодных і справядлівых выбараў, а адпаведна і абраных дэпутатаў не існуе”, — падкрэсліў сустаршыня БХД.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: