Вольгу Кавалькову хочуць аштрафаваць за ўдзел у пікеце памяці

Сустаршыню аргкамітэта Беларускай Хрысціянскай дэмакратыі Вольгу Кавалькову хочуць прыцягнуць на адміністрацыйнай адказнасці за ўдзел у несанкцыянаваным масавым мерапрыемстве.
Вольга Кавалькова на пікеце памяці 16 верасня. Фота з Facebook

Вольга Кавалькова на пікеце памяці 16 верасня. Фота з Facebook

Такім мерапрыемствам палічылі пікет памяці зніклых палітыкаў, які прайшоў 16 верасня падчас збору подпісаў за вылучэнне ў кандыдаты лідара Аб'яднанай Грамадзянскай партыі Мікалая Казлова.

27 верасня Вольга Кавалькова атрымала позву ў Цэнтральны РУУС, дзе яе чакалі яшчэ 24 верасня для складання пратакола па артыкуле 23.34 КаАП. Хутчэй за ўсё пратакол на актывістку склалі без яе прысутнасці. Калі будзе суд — пакуль невядома. 

Пікет адбыўся у дзень 20-годдзя са дня знікнення сябра Палітрады АГП Віктара Ганчара і бізнесмена Анатоля Красоўскага. Акрамя Мікалая Казлова на ім прысутнічалі больш за дзесяць палітыкаў і актывістаў. Да пікетоўцаў прыйшоў з папярэджаннем прадстаўнік выбарчай камісіі па Старавіленскай акрузе у № 105. На яго думку, подпісы трэба збіраць без падобных заяваў.

18 верасня Мікалая Казлова выклікалі ў акруговую камісію і там вынеслі папярэджанне. Хоць Казлоў сцвярджаў, што расследванне палітычных знікненняў — частка яго перадвыбарчай праграмы, аднак камісія палічыла гэта агітацыяй. 

spring96.org

Хочаце ведаць больш? Сачыце за нашымі публікацыямі ў Telegram і Facebook!