Жана Румас: Сяргей Румас за мяжой

Шэраг тэлеграм-каналаў 3 лютага паведаміў аб магчымым затрыманні былога прэм’ер-міністра Беларусі Сяргея Румаса і колішняга старшыню праўлення «Белінвестбанка» Генадзя Сысоева.


Жана Румас, жонка Сяргея Румаса, спачатку пацвердзіла ў каментары «Нашай ніве», што мужа дома няма, але запэўніла, што «сама ва ўсім разбярэцца». Пазней яна паведаміла Tut.by, што яе муж «знаходзіцца ў ад’ездзе за межамі Беларусі». Тэлефон Сяргея Румаса недасяжны. Тым часам «Наша ніва» са спасылкай на ўласныя звесткі сцвярджае, што Сяргей Румас у адной з краінаў, дзе жывуць яго старэйшыя сыны, — у Італіі або ў Вялікабрытаніі, перадае Радыё Свабода.

Прадстаўнікі беларускіх сілавых структур не пацвярджаюць і не абвяргаюць затрыманне (так заявілі ў КДБ) або не даюць каментароў (МУС, Следчы камітэт).

Назіральнікі прыгадваюць, што 16 жніўня жонка экс-прэм’ера Жана Румас размясціла ў сацсетках сэлфі з мужам на фоне пратэстоўцаў з даху «Банка развіцця».

У свой час Румас кіраваў гэтым банкам і, на прызнанне экспертаў, гэта быў адзін з самых прагрэсіўных праектаў банкаўскай сферы за ўсе гады незалежнасці краіны.

Лукашэнка так казаў пра замену Сяргея Румаса на Рамана Галоўчанку на прэм’ерскай пасадзе пасля жнівеньскіх падзей: «Ёсць і іншыя, якіх мы своечасова разглядзелі і адправілі каго на пакой, каму проста прапанавалі займацца бізнесам. Яны таксама дзесьці посцяцца».

Акрамя таго, Сяргей Румас быў у добрых стасунках з калегам-банкірам Віктарам Бабарыкам.

Таксама з’явілася інфармацыя аб затрыманні выканаўцы абавязкаў дырэктара ААТ «Беларуская лясная кампанія», экс-кіраўніка «Белінвестабанку» Генадзя Сысоева і шэрагу топаў «Белаграпрамбанку».

Сяргея Румаса прызначылі прэм’ерам 18 жніўня 2018 году, звольнілі 4 чэрвеня 2020 году. Свабода прыгадала, чым ён адзначыўся на гэтай пасадзе.


Заступаўся за заўзятараў з бел-чырвона-белым сцягам і гербам Пагоня

Сяргей Румас любіць футбол, яго часта можна было заўважыць на трыбунах, калі ён быў і віцэ-прэм’ерам, і кіраўніком ураду. Ад красавіка 2011-га па 2019 год Сяргей Румас кіраваў Федэрацыяй футболу. Падчас сустрэчы Беларусь — Македонія ў Барысаве затрымалі заўзятараў за нацыянальную сімволіку. Тады Федэрацыя футболу стала на іх абарону.


Шматдзетны бацька

Сяргей Румас з жонкай маюць чатырох сыноў. Старэйшы сын Валер скончыў эканамічны факультэт БДУ, пасля вучыўся ў Лондане, але вярнуўся на радзіму. Яшчэ трох сыноў завуць Максім, Сяргей і Філіп.


Паспяховы банкір

Сяргея Румаса ўзялі на працу ў Нацыянальны банк адразу пасля службы ў войску, але ў 1990-х ён на некаторы час падаўся ў камерцыю. Займаў высокія пасады ў камерцыйных банках «Паўночны Захад» і «Садружнасць».

Пасля гэтага Румас працаваў у «Беларусбанку», але найбольш паспяховым было знаходжанне на пасадзе старшыні «Белаграпрамбанку», за час ягонага кіравання банк займеў у 1,5 раза больш укладчыкаў. У часы кіравання Румаса гэты банк называлі найбольш стабільным.


Дамогся мінімальнай інфляцыі

Сяргей Румас як былы банкір у тандэме з Нацбанкам здолеў дасягнуць мінімальнай інфляцыі ў 5%. Некалькі разоў быў пабіты рэкорд стаўкі рэфінансавання, якая цяпер 8%.

Сяргею Румасу на сваёй пасадзе давялося выцягваць з крызісу многія сферы, напрыклад дрэваапрацоўку, мадэрнізацыя якой так і не дала выніку. Але гэтая сфера і цяпер у крызісе.

Па выніках першага году прэм’ерства Сяргея Румаса ВУП Беларусі вырас на 3%, летась толькі на 1,2%.


Амаладзіў кабінет міністраў

Пры Румасу значна амаладзіўся кабінет міністраў, там працавалі міністр фінансаў Максім Ермаловіч (42 гады), Дзмітрый Круты (39 гадоў), першы віцэ-прэм’ер Аляксандар Турчын (44 гады).


Перажыў «падатковы манёўр» і пагрозу інтэграцыі

На сваёй пасадзе Сяргей Румас заспеў няпростыя часы для беларускай эканомікі: у Расіі правялі падатковы манёўр, які моцна ўдарыў па беларускай нафтаперапрацоўцы. Страты ацанілі ў больш як 400 мільёнаў долараў.

Таксама ў пачатку году Расія прыпыніла пастаўкі нафты ў Беларусь, што таксама мусіў вырашыць урад Румаса. А 2019 год скончыўся для ўраду перамовамі пра «паглыбленую інтэграцыю», у гэтым пытанні ўрады Беларусі і Расіі так і не дамовіліся.


Сышоў займацца бізнесам

Паводле Лукашэнкі, які прызначыў новы ўрад, да Сяргея Румаса «асаблівых нараканняў няма», але «чалавек хоча займацца бізнесам». Цяпер урад узначаліў былы кіраўнік ВПК Раман Галоўчанка.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: