Ніна Шыдлоўская заклікае не спыняць дапамогі сем’ям патрыётаў

«Беларуская вясна» прынесла яе ўдзельнікам сотні прысудаў на штрафы і суткі. Аднак ёсць і тыя патрыёты, хто застаецца за кратамі, ім пагражаюць сур’ёзныя тэрміны зняволення.

Ніна Шыдлоўская. Фота "Радыё Свабода"

Пра тое, чым можна дапамагчы сем’ям былых сяброў «Белага легіёну», гаворыць старшыня «Згуртавання беларусаў свету “Бацькаўшчына”» Ніна Шыдлоўская.

— Частка сем’яў засталася без кармільцаў. Гэта жонкі з малымі дзецьмі на здымных кватэрах. Ужо зараз відавочна, што гэтая справа стане марафонам, яна хутка не вырашыцца. А сем’ям трэба збіраць перадачы, жыць самім, карміць сваіх дзетак. І я звяртаюся да ўсіх, хто толькі можа мяне пачуць: не спыняйце гэтай матэрыяльнай дапамогі сем’ям, бо ім без нашай дапамогі, яшчэ ў стане псіхалагічнага прэсінгу з усіх бакоў, самім справіцца немагчыма. А спадзяванняў на хуткае вырашэнне справы пакуль няма.

Былых удзельнікаў арганізацыі “Белы легіён” беспадстаўна абвінавачваюць у стварэнні незаконных узброеных фармаванняў і працягваюць утрымліваць за кратамі. Каб даведацца, якім чынам дапамагчы іх сем’ям, дастаткова зайсці на старонку інтэрнэт-суполку BY_help.

Максім Каўняровіч, Беларускае Радыё Рацыя

 

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!