БагатаДата 2-8 траўня

На тыдні свае прафесійныя святы адзначаць шматлікія «акулы пяра». А таксама палітыкі, пісьменнікі, дзяржаўныя дзеячы. Хто? Чытайце ў нашым аглядзе.

2 траўня

Дзень астраноміі.

1935. У вёсцы Варонічы Слонімскага раёна на Гродзеншчыне нарадзіўся акадэмік, доктар фізіка-матэматычных навук Мікалай Аляхновіч. У 1993-2004 гадах — дырэктар Інстытута фізікі цвёрдага цела і паўправаднікоў Акадэміі навук.

3 траўня

Сусветны дзень свабоды прэсы.

4 траўня

Міжнародны дзень пажарных.

Геранім Фларыян Радзівіл

Геранім Фларыян Радзівіл

1715. У горадзе Бяла-Падляска (цяпер Польшча) нарадзіўся дзяржаўны дзеяч ВКЛ, мецэнат Геранім Фларыян Радзівіл. Падчашы і вялікі харужы Вялікага княства Літоўскага. Заснаваў тэатр на радзіме і ў Слуцку. Прычым пры ім была акцёрская школа — першая ў Рэчы Паспалітай. Заснаваў у Слуцку мануфактуру па вытворчасці шаўковых паясоў з арнаментам. Меў уласнае 6-тысячнае войска, роўнае па колькасці войску ВКЛ. Пры арміі дзейнічала афіцэрская школа. Геранім Фларыян Радзівіл быў вельмі жорсткай асобай — адпаведна меў і мянушку «Жорсткі». Задушыў Крычаўскае паўстанне. У падзямеллях слуцкага замка заўжды было шмат зняволеных. Меў трох жонак, якіх трымаў практычна пад замком. Нашчадкаў не пакінуў.

1900. У Оршы нарадзіўся беларускі дзяржаўны дзеяч Нічыпар Наталевіч. Выконваў абавязкі старшыні Цэнтральнага выканаўчага камітэту БССР, старшыня прэзідыуму Вярхоўнага Савету БССР, дэпутат Вярхоўнага Савету СССР.

1975. Заснаваны Мінскі інстытут культуры — цяпер Беларускі дзяржаўны ўніверсітэт культуры і мастацтваў.

5 траўня

Міжнародны дзень барацьбы за правы інвалідаў, а таксама барацьбы з астмай і Дзень акушэркі. Дзень друку ў Беларусі.

1960. У Мінску нарадзіўся палітык Юрась Беленькі, беларускі палітык, дэпутат Мінгарсавету і апазіцыі БНФ у Вярхоўным Савеце 12 склікання ў першай палове 1990-х гадоў. Уваходзіў у ценявы ўрад БНФ. Цяпер намеснік старшыні партыі КХП-БНФ.

6 траўня

1940. У вёсцы Шоўкавічы Рэчыцкага раёна Гомельскай вобласці нарадзіўся пісьменнік Уладзімір Ліпскі. Шмат піша для дзяцей. Галоўны рэдактар дзіцячага часопіса «Вясёлка». Кіраўнік Беларускага дзіцячага фонду. Ініцыятар Усебеларускага фестывалю народнага гумару ў Аўцюках Калінкавіцкага раёна на Гомельшчыне.

7 траўня

Дзень работнікаў радыё, тэлебачання і сувязі ў Беларусі.

8 траўня

Міжнародны дзень Чырвонага Крыжа. Адзін з Дзён замірэння і памяці ахвяр Другой сусветнай вайны, абвешчаных ААН (другі — 9 траўня).

1945. У расійскім Арэнбургу нарадзіўся адзін з заснавальнікаў легендарнага гурта «Песняры» Уладзіслаў Місевіч. Затым ён стаў дырэктарам гурта «Беларускія песняры».

1965. Брэсцкай крэпасці было прысвоена званне «Крэпасць-герой».

1985. У Мінску адбылося адкрыццё стэлы «Мінск — горад-герой».

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: