БагатаДата 30 лістапада — 6 снежня

Круглая гадавіна з дня народзінаў Міхася Лынькова, і чвэрць стагоддзя Будапешцкага мемарандуму, які не перашкодзіў аднаму з «гарантаў суверэнітэту» ўварвацца ва Украіну. Чым яшчэ адметныя гэтыя дні — у нашым аглядзе.

Сёння — Сусветны дзень хатніх жывёлаў.


30 лістапада

Міжнародны дзень абароны інфармацыі і Сусветны дзень хатніх жывёлаў.

1899. У вёсцы Зазыбы Лёзненскага раёна на Віцебшчыне нарадзіўся пісьменнік Міхась Лынькоў. Працаваў галоўным рэдактарам часопіса «Полымя рэвалюцыі», дырэктарам Інстытута літаратуры, мовы і мастацтва Акадэміі навук. Быў старшынёй праўлення Саюза пісьменнікаў, дэпутатам Вярхоўнага Савета БССР. Аўтар знакамітай аповесці «Міколка-паравоз», паводле якой зняты фільм. Іншыя вядомыя творы: «Пра смелага ваяку Мішку», «Векапомныя дні».


1 снежня

Сусветны дзень барацьбы са СНІДам.


1939. У вёсцы Стайкі Аршанскага раёна на Віцебшчыне нарадзіўся матэматык Уладзімір Платонаў, які ў 1987–1992 гадах быў прэзідэнтам Акадэміі навук Беларусі.

1969. У Гомелі нарадзіўся банкір, цяперашні прэм’ер-міністр Беларусі Сяргей Румас.

1989. У Маскве памёр Мікалай Патолічаў. Ураджэнец Дзяржынскага раёна, але Ніжагародскай вобласці Расіі, ён у першай палове 1950-х гадоў быў першым сакратаром кампартыі Беларусі. Затым займаў пасаду намесніка міністра замежных спраў СССР, таксама кіраваў Міністэрствам знешняга гандлю СССР.


2 снежня

Міжнародны дзень барацьбы за адмену рабства.

1954. У Мінску нарадзіўся мастак Андрэй Смаляк. Мае срэбны медаль Еўрапарламенту за ўнёсак у еўрапейскае мастацтва.

1959. У вёсцы Гайнаўка на Беласточчыне нарадзіўся Міхал Андрасюк, пісьменнік, журналіст, актыўны дзеяч беларускай меншасці ў Польшчы. Працаваў настаўнікам і каменячосам, затым журналістам беластоцкай рэдакцыі Радыё «Рацыя». Па снежань 2010 года шэф Радыё «Рацыя», вядучы тэлеканала «Белсат».


3 снежня

Міжнародны дзень інвалідаў і Сусветны дзень адмовы ад пестыцыдаў.

1944. У вёсцы Кавалі Брагінскага раёна на Гомельшчыне нарадзіўся Міхаіл Раманюк, мастацтвазнаўца і этнограф. Аўтар альбомаў «Беларускае народнае адзенне», «Беларускія народныя крыжы». Кансультаваў многія мастацкія фільмы кінастудыі «Беларусьфільм» — у прыватнасці, «Людзі на балоце». Працаваў галоўным рэдактарам часопіса «Мастацтва».

Міхаіл Раманюк


4 снежня

1939. Выйшаў указ прэзідыума Вярхоўнага Савета СССР «Аб стварэнні Баранавіцкай, Беластоцкай, Брэсцкай, Вілейскай і Пінскай абласцей», які зацвердзіў новае адміністрацыйнае дзяленне заходніх рэгіёнаў Беларусі.

1959. У Мінску адкрыўся для наведванняў Дзяржаўны літаратурна-мемарыяльны музей Якуба Коласа. Раней пісьменнік там жыў з сям’ёй: гэты дом класіку беларускай літаратуры быў падораны ўрадам БССР на 70-годдзе.

Дзяржаўны літаратурна-мемарыяльны музей Якуба Коласа

1989. Створана Цэнтральная камісія Беларусі па выбарах і правядзенні рэспубліканскіх рэферэндумаў.


5 снежня

Міжнародны дзень добраахвотнікаў у імя эканамічнага і сацыяльнага развіцця.

1994. Быў падпісаны Будапешцкі мемарандум, паводле якога Беларусь і Украіна цалкам адмаўляліся ад ядзернай зброі, што заставалася на іх тэрыторыях з савецкіх часоў, а наўзамен Расія, ЗША і Вялікабрытанія гарантавалі дзвюм краінам суверэнітэт.

Падпісанне Будапешцкага мемарандума


6 снежня

У Беларусі святкуюць Дзень юрыста (адзначаецца ў першую нядзелю снежня).

1899. У Маскве нарадзіўся тэатральны рэжысёр Барыс Мардвінаў. На мяжы 1940-х і 1950-х гадоў працаваў галоўным рэжысёрам Тэатра оперы і балета ў Мінску. Пры ім былі пастаўленыя «Алеся» і «Кастусь Каліноўскі». У 1953-м вярнуўся ў Маскву, і праз некалькі гадзін пасля вяртання памёр ад інфаркту.


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!