ААН папярэдзіла пра яшчэ адно наступства пандэміі

У дзясятках краін свету былі адкладзеныя масавыя прышчэпныя кампаніі для дзяцей, паведамляе korrespondent.net.

У свеце катастрафічна знізіліся тэмпы вакцынацыі дзяцей ад адру, поліяміеліту, дыфтэрыі, слупняка і коклюшу, што можа справакаваць ўспышкі гэтых хвароб.

Летась, калі ўвесь свет сутыкнуўся з пандэміяй каронавіруса, планавую імунізацыю ад асноўных хвароб не прайшлі 23 мільёны дзяцей (на 3,7 мільёна больш, чым у 2019 годзе), гаворыцца ў дакладзе Сусветнай арганізацыі аховы здароўя (СААЗ) і дзіцячага фонду ААН (ЮНІСЕФ), апублікаваным у чацвер, 15 ліпеня.

Як удакладнілі аўтары справаздачы, каля 17 мільёнаў дзяцей не атрымалі ніводнай вакцыны ў 2020 годзе. У цэлым у 66 краінах было адкладзена правядзенне 57 масавых прышчэпачных кампаній.

У мінулым годзе каля 22,7 мільёна дзяцей (на 3,5 мільёна больш, чым на год раней) прапусцілі прыём першай дозы вакцыны ад дыфтэрыі, слупняка і коклюшу. Пры гэтым колькасць тых, хто не быў у тэрмін прышчэплены ад адру, вырасла на тры мільёны і дасягнула паказчыка ў 22,3 мільёна.

"Шматлікія ўспышкі хвароб могуць стаць катастрофай для суполак і сістэм аховы здароўя, якія вядуць бітву з COVID-19. Гэта робіць яшчэ больш тэрміновай, чым калі-небудзь, задачу інвеставання ў вакцынацыю дзяцей", — пракаментаваў даклад генеральны дырэктар СААЗ Тэдрас Аданам Гебрэйесус.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: