Белы дом паведаміў аб магчымасці новых санкцый супраць Расіі за падтрымку Башара Асада

ЗША маюць намер ўвесці дадатковыя санкцыі супраць Расіі ў адказ на падтрымку Масквой рэжыму Башара Асада. Пра тое, што такая фармулёўка ўтрымліваецца ў матэрыялах для прэсы, падрыхтаваных для суботняга брыфінгу ў Белым доме, паведаміў эксперт Atlantic Council, былы дарадца санкцыйных бюро Мінфіна ЗША Браян О'Тул. На гэта звярнуў увагу РБК.

Спадар О'Тул пацвердзіў выданню, што бачыў дакумент з такой фразай. Пра прысутнасць падобнай фармулёўкі ў матэрыялах прэс-службы Белага дома таксама паведаміў брытанскі таблоід Daily Mail. Газета удакладніла, што ўлады ЗША не змаглі аператыўна пракаментаваць гэтую інфармацыю.

Раніцай 14 красавіка ЗША, Вялікабрытанія і Францыя нанеслі ўдары па мэтах у Сірыі. Па папярэдніх дадзеных, у выніку удараў пацярпелі тры чалавекі, ахвяраў няма. Краіны НАТО падтрымалі ўдары кааліцыі. Расія склікала экстранае пасяджэнне Савета бяспекі ААН, дзе прадставіла праект рэзалюцыі, якая асуджае атаку на Сірыю. Рэзалюцыя была адхіленая.


Паводле kommersant.ru

Хочаце ведаць больш? Сачыце за нашымі публікацыямі ў Telegram і Facebook!