Ціханоўская, Цапкала і Калеснікава намінаваныя на прэмію «За свабоду думкі» імя Сахарава

Сацыял-дэмакратычная фракцыя Еўрапейскага парламенту намінавала Святлану Ціханоўскую, Марыю Калеснікава і Вераніку Цапкала на праваабарончую прэмію імя Сахарава. Інфармацыя пра гэта апублікаваная на афіцыйным партале S & D, піша Свабода.



«Уражаныя няспыннымі мірнымі дэмакратычнымі пратэстамі ў Беларусі супраць сфальсіфікаваных выбараў 9 жніўня, мы глыбока перакананыя, што сёлетняй прэміяй Сахарава трэба ўганараваць адважных беларускіх жанчын, якія змагаюцца за свабоду і дэмакратыю ў сваёй краіне, — заявіла ў сераду намесніца кіраўніка групы S&D Каці Піры.

Яна дадала, што сацыял-дэмакратычная фракцыя Еўрапарламенту знаходзіцца на баку народа Беларусі і асуджае падаўленне пратэстаў уладамі.

Прэмія «За свабоду думкі» імя Сахарава штогод уручаецца Еўрапейскім парламентам асобам, якія зрабілі «выключны ўнёсак у барацьбу за правы чалавека па ўсім зямным шары».

У апошнія гады яе атрымлівалі Ільхам Тохці (2019), Алег Сянцоў (2018), Дэмакратычная апазіцыя Венесуэлы (2017). Сярод беларусаў прэміяй Сахарава былі ўзнагароджаны Беларуская асацыяцыя журналістаў (2004) і Аляксандр Мілінкевіч (2006). 

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: