Дасье ў карыкатурах. Сардэчна запрашаем у лічбавую дыктатуру!

Бан акаўнтаў Трампа і ягоных фанатаў у сацыяльных сетках выклікаў у свеце спекуляцыі пра пачатак усталявання глабальнай дыктатуры буйных інтэрнэт-кампаній.



Акаўнты экс-прэзідэнта ЗША, а таксама яго прыхільнікаў у Facebook, Twitter і Instagram заблакаваныя пасля штурму Капітолія. Пры гэтым уладальнікі сацыяльных сетак нават не вельмі клапоцяцца адносна таго, каб прыдумаць прыстойны матыў для сваіх дзеянняў. Зачыстку ў сеціве тлумачаць тым, што твіты Трампа, маўляў, «прадстаўляюць пагрозу грамадскай бяспецы» і «прапагандуюць гвалт». Па сутнасці, карпарацыя ставіць сябе вышэй за дзяржаву. Не дарма брытанскі Spectator выявіў сімвалы самых вядомых інтэрнэт-кампаній побач з вежай Капітолія — старога сімвала амерыканскай дзяржаўнасці.


З іншага боку, палітычныя праціўнікі Трампа з натхненнем сустрэлі навіны аб масавых блакаваннях і не бачаць ніякіх парушэнняў свабоды слова ў дзеяннях IT-карпарацый. Нядзіўна, што блізкая ім прэса публікуе карыкатуры накшталт прац мастака Антоніа Радрыгеса



Безумоўна, забарона Трампу мець зносіны ў сацсетках вялікі ўдар па яго асабістаму эга. Праз Twitter Трамп задаваў інфармацыйную позву, дыктаваў палітычную волю, прызначаў на пасады і з ганьбай звальняў. Нездарма International New York Tribune калісьці параўнаў кнопку на трампаўскім акаўнце ў Twitter з кнопкай запуску ядзернай бомбы.


Аднак праблема куды глабальней. Трампа і яго прыхільнікаў (прыблізна палова электарату ЗША) пазбавілі найважнейшага інструмента камунікацыі, арганізацыі і барацьбы за свае правы. Адзінага, па сутнасці, інструмента, даступнага Трампу ва ўмовах, калі традыцыйныя амерыканскія СМІ знаходзяцца пад кантролем лібералаў. Атрымліваецца, што Марк Цукерберг і Джэк Дорсей (уладальнікі Facebook і Twitter) цяпер маюць правы вызначаць, каму і што можна казаць. Таму шмат хто лічыць, што цэнзура Трампа — гэта пачатак трансфармацыі свету да эры тыраніі лічбавых карпарацый. Тэматычны малюнак з рэсурсу Cagle.


Зрэшты, калі гэта і так, да сапраўднай дыктатуры таго ж Цукерберга яшчэ вельмі далёка. Затое іншыя наступствы блакады трампістаў праявяцца куды хутчэй. Брутальныя паводзіны ІТ-кампаній радыкалізуюць правы рух. Метафарычна гэты працэс выявіў мастак часопіса Counterpoint. На яго малюнку актывіст-радыкал робіць адпаведныя палітычныя тату слану — сімвалу партыі рэспубліканцаў.



На жаль, падзеі за акіянам могуць узмацніць цэнзуру ў краінах, дзе і так хапае праблем з дэмакратыяй. Аўтарытарныя лідары, на думку некаторых экспертаў, атрымалі алібі для большага кантролю над сацыяльнымі медыя, якія перастаюць быць палітычна нейтральнымі. Змрочную будучыню інтэрнету ў той жа Расіі выявіў аўстрыйскі мастак Мар’ян Камінскі.


Зрэшты, пакуль усё ж яшчэ не выключаюць, што ўладальнікам Facebook або Twitter раптам проста захацелася трошкі пагуляць у палітыку, і ніякіх палітычных падтэкстаў у забаронах не было.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: