ФСБ не пусціла ЛГБТ-актывістаў у «горад, вольны ад геяў»

Супрацоўнікі ФСБ затрымалі групу ЛГБТ-актывістаў і карэспандэнта тэлеканала "Дождь", якія спрабавалі ўехаць у закрыты горад Светагорск Ленінградскай вобласці.

Трапіць у Светагорск можна толькі па шэнгенскай візе або па запрашэнні

Двое затрыманых пры ўездзе вызваленыя, яшчэ чацвёра актывістаў і карэспандэнт, затрыманыя ўжо ў горадзе, застаюцца ў мясцовым аддзяленні ФСБ.

Як паведамляе партал "ОВД-Инфо" са спасылкай на маскоўскую актывістку Ірыну Яцэнка, усяго ў горад паехалі шасцёра актывістаў і карэспандэнт тэлеканала "Дождь".

У Светагорску дзейнічае асаблівы рэжым допуску. Для таго, каб заехаць у горад, патрэбная альбо адкрытая шэнгенская віза, альбо імянное запрашэнне ад жыхара горада. У актывістаў гэтых дакументаў не было.

Барыса Канакова і Андрэя Патапава знялі з аўтобуса на прапускным пункце ў ходзе выбарачнай праверкі дакументаў. Яшчэ чацвёра актывістаў і карэспандэнт тэлеканала "Дождь" паехалі далей. Як сцвярджае актывістка Ірына Яцэнка, паліцыянты спецыяльна шукалі ЛГБТ-актывістаў, якія прыбылі на аўтобусе, на вуліцах горада.

Цяпер чацвёра актывістаў: Ірына Сігава, Аляксей Назараў, Аляксей Сяргееў, Кацярына Белакрыс і карэспандэнт "Дажджу" Яўгенія Зобніна знаходзяцца ў аддзяленні ФСБ. Па словах Ірыны Яцэнка, звязацца з імі не ўдаецца. Актывістам могуць быць высунуты абвінавачанні ў парушэнні памежнага рэжыму.

Знятыя з аўтобуса актывісты Барыс Канакоў і Андрэй Патапаў адпушчаныя пасля гутаркі.

У пачатку сакавіка кіраўнік адміністрацыі Светагорску Сяргей Давыдаў абвясціў горад "свабодным ад геяў". Пасля гэтага ЛГБТ-актывіст Аляксей Назараў прапанаваў кіраўніку горада арганізаваць у Светагорску гей-турызм і гей-парад.

На мінулых выходных Давыдаў зноў звярнуў на сябе ўвагу СМІ, заявіўшы, што ў горадзе "заміратачыў бюст Леніна".

 ЛГБТ-актывісты, якія накіроўваліся ў горад, хацелі сустрэцца з Давыдавым. Як паведамляюць мясцовыя СМІ, у адказ на пытанне пра мэту паездкі адзін з актывістаў адказаў, што хоча "заявіць пра сваё існаванне".

Паводле ВВС



Хочаце ведаць больш? Сачыце за нашымі публікацыямі ў Telegram і Facebook!