Іракскія курды прагаласавалі за незалежнасць

Насельніцтва іракскага Курдыстана пераважнай большасцю прагаласавала за незалежнасць на рэферэндуме, што адбыўся ў панядзелак.


Па дадзеных выбарчай камісіі Курдыстана, 92,73% тых, хто прыняў удзел у рэферэндуме, аддалі свае галасы за незалежнасць гэтай аўтаномнай тэрыторыі. 7,27% выступілі супраць.

Усяго ў рэферэндуме прынялі ўдзел каля 3,3 мільёна чалавек, гэта прыкладна 72% выбарцаў.

Лідар іракскіх курдаў Масуд Барзані заявіў, што вынікі галасавання не прывядуць да неадкладнай аб'явы незалежнасці, але павінны адкрыць дзверы для перамоваў.

Курдскія лідэры перакананыя ў тым, што зараз у іх ёсць мандат на вядзенне перамоваў з Багдадам аб аддзяленні.

Рэферэндум выклікаў жорсткую крытыку іракскага ўрада і суседніх з Іракам краін. Багдад да апошняга моманту патрабаваў яго адмены.

«Рэферэндум павінен быць адменены. Неабходна пачаць дыялог у рамках канстытуцыі. Мы ніколі не ўступім у перамовы па выніках рэферэндуму», — заявіў напярэдадні галасавання прэм'ер-міністр Ірака Хайдэр Абадзі.

«Мы ўсталюем іракскія законы па ўсёй тэрыторыі Курдыстана ў адпаведнасці з канстытуцыяй», — паабяцаў іракскі прэм'ер, выступаючы перад членамі парламента.

Іракскі парламент заклікаў урад краіны накіраваць войскі ў Курдыстан, каб узяць пад свой кантроль найважнейшыя нафтавыя радовішча на курдскай тэрыторыі.

Іракскія ўлады запатрабавалі ад замежных урадаў зачыніць свае дыпламатычныя місіі ў Арбіле, сталіцы Курдыстана.

Многія асцерагаюцца, што рэферэндум у іракскім Курдыстане прывядзе да новых рэгіянальных канфліктаў.


Чытайце таксама:

Курдская міна запаволенага дзеяння 


Дэлегацыя іракскіх вайскоўцаў ужо накіравалася ў Іран для каардынацыі мер у адказ.

Іран і Турцыя таксама пярэчаць аддзяленню Курдыстана. На днях іх арміі пачалі сумесныя вучэнні ў памежных з Курдыстанам раёнах. Ірак таксама правёў сумесныя з Турцыяй ваенныя манеўры.

Уладзімір Пуцін і яго турэцкі калега Рэджэп Таіп Эрдаган абмяркоўвалі сітуацыю вакол курдскага рэферэндуму ў тэлефоннай размове напярэдадні візіту расійскага прэзідэнта ў Анкару, прызначанага на чацве. У афіцыйным крамлёўскім камюніке не згадвалася аб гэтай тэме.

Абодва лідары «падкрэслілі важнасць захавання тэрытарыяльнай цэласнасці як Ірака, так і Сірыі».

У той час як Анкара асцерагаецца ўзмацнення сепаратысцкіх настрояў сярод турэцкіх курдаў, у Расиі свае эканамічныя інтарэсы ў Курдыстане. У прыватнасці, кампанія «Раснафта» ў апошні час нарошчвала свае інвестыцыі ў іракскім Курдыстане.

Яе асноўны праект тут — будаўніцтва нафтаправода з Курдыстана ў Еўропу — можа апынуцца пад вялікім сумневам.

Расійскі МЗС у заяве ад 27 верасня ізноў пацвердзіў падтрымку «суверэнітэту, адзінства і тэрытарыяльнай цэласнасці дружалюбнага Ірака, іншых дзяржаў Блізкага Усходу» і заклікаў курдаў шукаць прымальныя для іх рашэння ў межах адзінай іракскай дзяржавы.

Раней ЗША, Вялікабрытанія і міжнародная кааліцыя, якая змагаецца з групоўкай «Ісламская дзяржава», папрасілі адкласці рэферэндум на два гады.

Прэзідэнт іракскага Курдыстана Масуд Барзані сказаў, што адкладаць рэферэндум было занадта позна.

Паводле BBC


Хочаце ведаць больш? Сачыце за нашымі публікацыямі ў Telegram і Facebook!