Казахстан. Загадка гіганцкай вавёркі

Дыскусіі ў сацсетках Казахстана справакаваў арт-аб’ект у выглядзе 13-метровай вавёркі, што быў усталяваны ў цэнтры Алматы 8 ліпеня. На выраб вавёркі спатрэбілася 3,5 тоны саломы. Плануецца, што саламяная вавёрка будзе існаваць 9 месяцаў.

Фото informburo.kz


Хвост жывёлы дасягае ў даўжыню 15 метраў. Агульная вага аб’екту — 10–12 тон. Аўтарам скульптуры з’яўляецца мастак з Вялікабрытаніі Алекс Рынслер. За 15 гадоў сваёй практыкі ён паспеў папрацаваць у Кітаі, ЗША, Аўстраліі, Фінляндыі, Аргенціне і Паўднёвай Афрыцы. Адна з вядомых яго работ — скульптура лісы ў Шанхаі.

Цяжка сказаць, як рэагавалі на лісу ў Шанхаі, а вось у Алматы задуму Рынслера відавочна не зразумелі. Незвычайная фігура выклікала ў многіх шок. «Жах, што за ганьба!», «Здаецца, піць трэба менш», «Вось куды сыходзяць нашы падаткі», «Гэта ж колькі трэба выпіць, каб прыйшла такая вавёрачка?», — заўважылі карыстальнікі Facebook. У каментарах арт-аб’ект таксама параўналі з траянскім канём і Кінг-Конгам.


Яшчэ адна нагода для крытыкі помніка — сума, выдаткаваная на праект. Ён каштаваў каля 67 тысяч долараў.

Аднак самая цікавая версія наступная: вавёрку ўсталявалі адмыслова, каб яна адцягвала ўвагу ад фігуры Назарбаева. У пачатку ліпеня краіна святкуе дзень нараджэння кіраўніка дзяржавы, што звычайна выклікае нараканні насельніцтва. Цяпер увесь негатыў перацягнула на сябе гіганцкая вавёрка.

Паводле казахскай прэсы

Хочаце ведаць больш? Сачыце за нашымі публікацыямі ў Telegram і Facebook!