КНДР адмовілася ад перамоў з Паўднёвай Карэяй, сустрэча з Трампам пад пытаннем

Абурэнне КНДР выклікалі запланаваныя штогадовая вайсковыя вучэнні ЗША і Паўднёвай Карэі «Max Thunder», паведамляе «Радыё Свабода».

Кім Чэн Ын, архіўнае фота Радыё Свабода

Афіцыйнае інфармацыйнае агенцтва Паўночнай Карэі KCNA распаўсюдзіла заяву аб скасаванні перамоваў прадстаўнікоў КНДР з Паўднёвай Карэяй.

Паводле агенцтва, цяпер Злучаныя Штаты Амерыкі павінны «сур’ёзна задумацца аб лёсе» запланаванага саміту з удзелам прэзідэнта Дональда Трампа і кіраўніка КНДР Кім Чэн Ына.

Абурэнне КНДР выклікалі запланаваныя штогадовая вайсковыя вучэнні ЗША і Паўднёвай Карэі «Max Thunder», якія, паводле Паўночнай Карэі, ёсць «рэпетыцыяй нападу» і «правакацыйнай вайсковай шуміхай».

У Белым доме заявілі, што будуць і далей «працаваць у цеснай каардынацыі са сваімі хаўруснікамі». Дзяржаўны дэпартамент ЗША заявіў, што працягвае падрыхтоўку да «паўночнакарэйскага» саміту. Пентагон нагадваў, што мэты вучэнняў з Паўднёвай Карэяй выразна заяўляліся цягам многіх дзесяцігоддзяў: пашырэнне магчымасцей альянсу па абароне Рэспублікі Карэя, узмацненне бяспекі і падвышэнне боегатоўнасці».

Паўднёвая і Паўночная Карэі днём раней дамовіліся правесці перамовы на высокім узроўні 16 траўня на паўднёвым баку Пахнмунджома, размешчанага ў дэмілітарызаванай зоне паміж дзвюма краінамі. Гэта маглі быць першыя афіцыйныя перамовы пасля сустрэчы лідэраў дзвюх краінаў, Мун Чжэ Іна і Кім Чэн Ына, якая прайшла 27 красавіка 2018 году, якія сталі першай сустрэчай на найвышэйшым узроўні паміж КНДР і Паўднёвай Карэяй за больш чым 10 гадоў.

Трамп тыдзень таму паведаміў, што яго сустрэча з Кім Чэн Ынам адбудзецца ў Сінгапуры 12 чэрвеня. Як напісаў Трамп у твітары, абодва лідары паспрабуюць ператварыць сустрэчу ў «асаблівую падзею» для справы міру ва ўсім свеце.



Хочаце ведаць больш? Сачыце за нашымі публікацыямі ў Telegram і Facebook!

Каментаваць