КНДР запусціла дзве балістычныя ракеты. Гэта ўжо другі пуск за тыдзень

Паўночная Карэя запусціла дзве балістычныя ракеты малой далёкасці з раёна порта Вонсан на ўсходнім узбярэжжы краіны. Гэта ўжо другі пуск ракет у КНДР за тыдзень.
Ракеты былі выпушчаныя каля пяці гадзін раніцы ў сераду, праляцелі 250 км, дасягнуўшы вышыні каля 30 км, і ўпалі ў Японскае мора, паведаміў Аб’яднаны камітэт начальнікаў штабоў Паўднёвай Карэі.

Па словах міністра абароны Паўднёвай Карэі Чжон Кён Ду, ракеты адрозніваліся ад тых мадэляў, якія былі запушчаны раней.

Прэм’ер-міністр Японіі Сіндзо Абэ заявіў, што ніякай пагрозы для бяспекі краіны паўночнакарэйскія ракеты не ўяўлялі.

На мінулым тыдні КНДР запусціла дзве ракеты малой далёкасці, адна з якіх праляцела каля 690 км, а іншая — 430 км.

Гэта быў першы запуск пасля сустрэчы лідара Паўночнай Карэі Кім Чэн Ына з прэзідэнтам ЗША Дональдам Трампам у раёне дэмілітарызаванай зоны, якая падзяляе дзве Карэі. Тады яны дамовіліся працягнуць перамовы па дэнуклеарызацыі.

Неўзабаве пасля гэтага Пхеньян выказаў абурэнне з нагоды планаў ЗША і Паўднёвай Карэі правесці сумесныя штогадовыя ваенныя вучэнні.

Наступальныя магчымасці

Эксперты мяркуюць, што ў бліжэйшы час можна чакаць новых запускаў.

«Паўночная Карэя працягне выказваць свой гнеў, выпрабоўваючы ракеты ў бліжэйшыя дні, перад пачаткам вучэнняў у жніўні», — кажа эксперт Цэнтра нацыянальных інтарэсаў у Вашынгтоне Хары Казіяніс.

«Гэта зварот да Вашынгтона і Сеула: спыніце сумесныя вучэнні ці мы працягнем дэманстраваць свае ўласныя наступальныя магчымасці», — працягвае ён.

Паўночная Карэя называе гэтыя вучэнні парушэннем дамоўленасцей паміж Трампам і Кімам, дасягнутых у ходзе саміту ў Сінгапуры ў мінулым годзе.

У Пхеньяне сцвярджаюць, што вучэнні могуць падарваць аднаўленне перамоваў па дэнуклеарызацыі.

У панядзелак дзяржсакратар ЗША Майк Пампея заявіў, што перамовы могуць пачацца вельмі хутка, аднак ніякіх канкрэтных тэрмінаў агучана пакуль не было.

У мінулым годзе Кім Чэн Ын абяцаў, што КНДР спыніць ядзерныя выпрабаванні і не будзе запускаць міжкантынентальныя балістычныя ракеты.

Аднак здымкі са спадарожнікаў, зробленыя ў чэрвені, паказалі, што ў КНДР усё яшчэ могуць працягвацца аперацыі па перапрацоўцы радыеактыўных матэрыялаў.

Акрамя таго, Пхеньян працягвае дэманстраваць свае здольнасці да распрацоўкі новай зброі, нягледзячы на ​​жорсткія эканамічныя санкцыі.

У траўні Пхеньян зрабіў запуск ракеты малой далёкасці — гэта было першае ракетнае выпрабаванне з моманту запуску міжкантынентальнай ракеты ў 2017 годзе.

Таксама на мінулым тыдні КНДР прадэманстравала сваю новую падводную лодку, якая, як сцвярджаюць улады, здольная прыняць на борт да трох балістычных ракет.

Паводле BBC

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: