Краіны Балтыі высылаюць расійскіх дыпламатаў

Сёння, 23 красавіка, у МЗС Літвы быў выкліканы прадстаўнік расійскай амбасады. Яму заяўлена аб тым, што знаходжанне двух супрацоўнікаў дыпмісі на тэрыторыі краіны больш непажаданае, паведамляе reform.by.
Фота: МЗС Латвіі

Фота: МЗС Латвіі

МЗС Літвы ў прэс-рэлізе адзначае, што крок зроблены ў знак падтрымкі Чэхіі. Таксама заяўлена пра гатоўнасць дапамагчы амбасадзе Чэхіі ў Маскве ў выкананні функцый, калі афіцыйная Масква запатрабуе яшчэ больш скараціць яго штат.

Рашэнне аб высылцы дыпламатаў было прынята разам з Латвіяй і Эстоніяй.

МЗС Латвіі таксама прыняло рашэнне аб высылцы аднаго расійскага дыпламата. «Рашэнне заснавана на ўзаемных кансультацыях з саюзнікамі па ЕС і НАТА і інфармацыі, прадстаўленай адказнымі латвійскімі ўстановамі», — гаворыцца ў паведамленні знешнепалітычнага ведамства Латвіі.

МЗС Эстоніі таксама выслала аднаго расійскага дыпламата ў знак салідарнасці і дзеля выказвання пратэсту супраць дзеянняў расійскіх спецслужб у Чэхіі. Паведамляецца, што дзейнасць высланага супрацоўніка амбасады не адпавядае палажэнням Венскай канвенцыі.

«Расія груба парушыла міжнароднае права на тэрыторыі дзяржаў-чальцоў Еўрапейскага саюза і НАТА, што падарвала суверэнітэт Чэхіі і прывяло да гібелі двух чалавек. Такія паводзіны наносяць шкоду еўрапейскай бяспецы і стабільнасці і недапушчальныя», — адзначаецца ў заяве эстонскага МЗС.

Раней Польшча ў знак салідарнасці з Чэхіяй прыняла рашэнне выслаць трох расійскіх дыпламатаў. Расія адказала на гэта высылкай пяці супрацоўнікаў польскай амбасады.

Да гэтага ЗША выслалі дзесяць расійскіх дыпламатаў пасля абвяшчэння чарговага пакета санкцый супраць Масквы. Пазней Чэхія выслала 18 супрацоўнікаў расійскай амбасады, а потым прапанавала скараціць яго штат да парытэтнага з амбасадай у Маскве.


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: